عبدالعزيز البدراني

قصيدة الشاعر الكبير عبدالله بن زويبن المعمري الحربي رحمه الله في قبيلة حرب العريقة: البارحة يوم انقطع حس الأوناس سرّا الونيس من الونيس النعاسي فزيت مثل اللي مقزيه هوجاس متعرضه ظرفٍ من الوقت قاسي وشبيت لي غمرٍ عروقه بالأطعاس في راس قوزٍ ما تجيه التكاسي ما ياصله غير اشهبٍ يمرس أمراس أمراس ذيبٍ سامع له حساسي ووخرت من جمره وقدمت محماس بيضٍ خوات إلا بحجم المقاسي وسويت لي بريةٍ تسمر الراس فنجالها يبري السدر والعماسي وأخذت مع ميدان الأفكار مرواس عن ماضيٍ ما يستحق التناسي مجدٍ تفيض اله المشاعر والإحساس ويغار منه اللي براسه اعطاسي اليا ذكرت أفعال ربعي مع الناس قام يتزايد للمراجل حماسي وقامت رقبتي ترتفع فوق نوماس شوي وإلا ياصل الغيم راسي قصرٍ مثبتةٍ ركونه على ساس وبيتٍ مجوّد بالعمد والمراسي يوم الرجال بماضي الوقت تنقاس بالفعل ما هو بالرتب والكراسي توسطوا من نجد ميدان الأفراس وتمركزوا مثل الجبال الرواسي مسروح مزّين العداء علقم الكاس فزعاتهم تجلى السواد الطلاسي ودفانة الركبة طويلين الأنفاس اليا صار بمنون الحبال امتساسي فعولهم باللي لحده تعلاس تحط بالكبد الطرية يباسي كم خفرةٍ جاها كآبة ووسواس عقب السعادة طوقتها المآسي الهم والهوجاس والحزن والياس طوى حشاها طيّ سلك النحاسي على صبيٍ للمغاوير مدباس يروس ربعه باللقا ما يراسي عقب العيا والكبرياء والتغطراس داسوا خدوده في غبار المحاسي وكم طامعٍ جاهم وعود بالأفلاس كسوه من خام المذلة لباسي عدوا له اللي عد سالم لجساس رجال وسلاحٍ بوقتٍ قياسي وراحت جموعه روحةٍ دون منكاس جبرت على قلع النيا والمراسي وكم خايعٍ داسوه قدام ينداس كاسيه من بيض النواوير كاسي ما فيه غير الشقح والربد خناس برق الحباري والقطا والغماسي وذعذع لهم من ذاري العز نوماس على ظهور مبعدات المماسي وحرايرٍ عقب السرى مثل الأقواس وخيلٍ يدقن الجلد بالسداسي وتغنموا باللي تقلد بالأجراس حم الشعاف اللي بهن انقعاسي يوم الفخر بالرمح والدرع والطاس قبل يسود بنجد حكمٍ سياسي عبدالعزيز الفيصلي قاسي الباس جاها وحررها من الاختلاسي وخلا السباع اللي يحكن الأضراس تعلن له التوبة عن الافتراسي. -في الفيديو المرفق يُلقيها بنفسه في حفل زواج أحد أبناء القبيلة، في محافظة الرس عام ١٤٢٩هـ، بحضور الشاعر الكبير بدر بن عواد الحويفي رحمه الله. 👇🏻