Mohamad-محمّد

وزير الاوقاف السوري قال عدد العقارات الموقوفة حوالي 38,000 عقار نصها في مدينة حلب. حلب ملقبة ب أم الأوقاف، مدينة بتنافس اسطنبول والقاهرة على الوقف الخيري رغم صغر حجمها مقارنة فيهم. من انواع الاوقاف بحلب - وقف قديم اسمه جبر الخواطر وقف مخصص لتبديل الصحون والزبادي اللي بيكسروها الخدم أو الأطفال الفقراء وهنن وعم ينقلوا الأكل حتى ما ينكسر خاطرهم قدام اصحاب البيوت. - وقف إرضاع الأطفال وقف بيأمن الحليب والسكر والغذاء للأمهات اللي ما بيقدروا يرضعوا ولادهم. -وقف القطط والكلاب كانت مخصصة بس لشراء الأكل للقطط الضالة بالأسواق وعلاج الحيوانات المريضة. -وقف تجهيز العرائس مخصص لتأمين جهاز العروس للبنات الفقيرات واليتيمات. -الوقف الذري كتير عائلات حلبية عريقة وقفت بيوتها وقصورها لولادها وأحفادها حتى العقار ما ينباع ولا يتورث ويتقطع لقطع صغيرة ويبقى اسم العيلة مرفوع والبيت مجموع. - وقف المدارس والمشافي: حلب كانت مليانة بيمارستانات (مشافي) ومدارس شرعية وعلمية، وكلها كانت بتصرف على حالها من ورا دكاكين وأراضي موقوفة عليها لتضمن تعليم وصحة مجانية بتمويل ذاتي من الأوقاف قبل ما تصير الدول الحديثة وتستحدث وزارة الصحة والتعليم. موضوع الاوقاف بحلب ضخم ومعقد ومتشابك اكتر من الشام ب مية مرة، اكثر من نصف اوقاف سوريا كلها (حوالي 60%) موجود بحلب، معظم مدينة حلب القديمة ب اسواقها ال37 الضخمة الكبيرة وخاناتها ومشافيها ومدارسها مع اجزاء واسعة من الاحياء المحيطة ب اسوار المدينة القديمة املاك اوقاف المنطقة ب اتجاه القصر البلدي، الحديقة العامة ومحطة بغداد، ب اتجاه سوق الهال وحديقة باب انطاكية ب اتجاه جبانة الصالحين واتجاه جبل العظام مع المناطق الي بينهم والمحيطة فيهم معظمها وقف، حجم مرعب وعليه مؤسسات حكومية مثل القصر البلدي وفرع المرور وقيادة المنطقة الشمالية ومساجد ومدارس قديمة معظمها وقف نهبه حزب البعث وآل الاسد ودمرته العسكرتارية العلوية وشبه مسحتهم حلب فيها رزق وبركة وخير من ورا هالاوقاف، حجم وتنوع وعظمة اوقافها كانت بالنسبة الي من ادلة خيرية هالامة، ناس بتراكم مليارات بالمعنى الحرفي موقوفة لوجه الله لاطعام وتعليم وعلاج وجبر خاطر الفقراء، حتى الحيوانات والطيور كان الها وقف. ربنا يطول عمري اشوفها رحعت معمرة احسن من قبل وارجعلها قريب اعيش فيها باقي عمري واندفن مع جدي فيها.

43,559 görüntüleme