عطيه اليوبي

دخلنا #الربع_الخالي بسيارة صينيه،،، وطلعنا بقناعة مختلفة الربع الخالي مو صحراء عادية الربع الخالي اختبار حقيقي، لك وللسيارة وللرجال اللي معك مكان ما ينفع فيه الكلام ولا المواصفات اللي ينفع هو اللي يثبت نفسه في وسط الربع الخالي وتحت الضغط رحلتنا كانت عبور من الشرق للغرب، أكثر من 1600 كيلو داخل النفود والعروق والطرق الوعرة يعني مو طلعة بر عادية هذه تجربة ثقيلة كان معنا في الرحلة سيارة تانك 300 موديل 2025 – الشركة الأم GWM GWM TANK Saudi صناعة صينية بدون أي تجهيزات إضافية، أربع ركاب وعفش رحلات عادي، يعني اختبار على أصوله بدون تجميل وبصراحة أنا كنت قلقان أول مرة أدخل الربع الخالي وبسيارة صينية 🤔 وفي مكان لو تعطلت فيه، ما هو سهل تطلع منه السؤال اللي كان في راسي طول الوقت هل السيارة بتتحمل وتكمل معنا ولا لا؟ زاد خوفي أول ليلة لما غرست السيارة في الرمل كنا تقريبًا على بعد 200 كيلو من أقرب طريق أسفلت وقتها والله فكرت بيني وبين نفسي أنه لازم نوقف الرحلة قبل لا تتعقد الأمور وندخل فقلب الربع الخالي كنت ساكت بس القلق كان كبير دخلنا بعدها أعمق في الصحراء ومرة ثانية غرست السيارة هنا انتبهنا إن ضغط الكفرات كان غير مناسب وبعدها نقصنا الهواء بما يناسب النفود ومن وقتها تغير كل شيء السيارة صارت تمشي في الرمل وكأنها على طريق معبد ثبات، سلاسة، وتحكم في النفود بشكل يطمن وقتها بدأت أرتاح شوي شوي واجهنا عروق قوية، بعضها يخليك تحس إن السيارة طاحت على وجهها وبشكل مفاجئ ومع هذا الهيكل متماسك والقيادة مريحة، ولا واجهتنا أعطال ولله الحمد كل ما تقدمنا أكثر كل ما اختفى الخوف وجا مكانه احترام للأداء مو لأن السيارة ما غرست لكن لأنها تعاملت مع الظروف القاسية بثبات وكأنها مصممة لهالنوع من الطرق والحقيقة ان الرحلة ما نجحت بسبب السيارة لحالها نجحت لأن معنا رجال يعرفون الدرب صح قيادة محترفة، واختيار مسارات مضبوط، وتعامل هادي مع كل موقف وبرضه ما أقدر أتكلم عن أداء السيارة بدون ما أذكر سائقها ومالكها، أخوي عبدالرحمن الصقر (أبو راشد) اسال الله ان يبارك له في ماله وحلاله قيادته كانت هادئة و واثقة، يعرف متى يضغط ومتى يخفف، ويتعامل مع النفود والعروق بعقل وبخبرة السنين كثير من اللحظات اللي كنت قلقان فيها كانت تهون فقط لأني شايف قدامي سواق يعرف وش يسوي السيارة كانت جزء من النجاح، مو كل القصة والجميل في الموضوع إن الرحلة ما كانت إعلان، ولا تجربة مصورة لغرض التسويق كانت مغامرة حقيقية، بمخاطر حقيقية، وقرارات حقيقية. والنتيجة طلعت من قلب الربع الخالي مو بالكلام بل بالأداد القوي،، بعد الرحلة تغيرت نظرتي كثير ما صرت أركز على بلد الصنع قد ما أركز على وش تقدر السيارة تسوي وقت الجد 📍تانك 300 في هذه الرحلة ما كانت بس مفاجأة كانت تجربة خلتني أراجع كثير من أفكاري عن السيارات الصينية وأنا صريح في هذا الكلام لأن اللي شفته كان على أرض الواقع ولما وصلنا #وادي_الدواسر بعد عبور الربع الخالي ما كان الشعور بس فرحة الوصول كان شعور شكر وامتنان لله أولًا، ثم للمرشدين اللي قادوا الدرب، ثم للرفقة الطيبة اللي خلت التعب يهون بعض الرحلات ما تغير مكانك بس تغير أفكارك بعد وهذي الرحلة غيرت فينا الكثير. Motory موتري شبكة السيارات الصينية المربع نت

518,637 görüntüleme