م. فايز الفرحان Fayez ALanazi

كامل كلمات قصيدة الشاعرة بشاير المقبل في أخوها ـــــــــــــــــــــــــــــــــــــــــــــــــــ التي [ ابكت .. أخوها والجمهور ] ـــــــــــــــــــــــــــــــــــــــــــــــــــ هذاك اخوي اللي يميلون ما مال في ذمتي يبطون منا ياصلونه الله يديمه لي على كل الاحوال ولا اعيش يوماً من حياتي بدونه ـــــــــــــــــــــــــــــــــــــــــــــــــــ الرزق من عند الله الوان واشكال يفرق بعرف الناس شكله ولونه وانا حلفت بقاسم الحظ والمال مجري الفلك مابين كافه ونونه انه عطاني من سخى جوده جبال يومه عطاني واحداً تعرفونه رجال بهروجة وبالفعل رجال ورث جهاده في يدينه خشونه بخاف ربه من مواثيم الاهمال ويخاف ربه في خطاوي عيونه معكاز ابوه ان صارت حموله ثقال يبشر بحاجاته قبل يندهونه ما يستحي من كلمة الحق لا قال ذرب الهروج وكلمته ماتخونه شرقي مبادي كفواً كفو جزال لو ان جيبه يشتكي من ديونه مع صلف طبعه له مواريد ازلال قلبه كبير وله يدين حنونه تنبت محايا لخاطري رزع وانفال لا امطرت يا خيتي من مزونه ان جوني عيالي مطاليق ورجال من طيب راسه طيبهم ياخذونه هذاك اخوي اللي يميلون ما مال في ذمتي يبطون منا ياصلونه الله يديمه لي على كل الاحوال ولا اعيش يوماً من حياتي بدونه ويالله عساني قبله بصف الاجال ويلقون غلاته بصفحتي ينشدونه ـــــــــــــــــــــــــــــــــــــــــــــــــــ قصيدة الشاعرة #بشاير_المقبل في أخوها كانت ضمن مشاركة لها في برنامج #فرسان_القصيد قبل حوالي 5 سنوات وكان "فرسان القصيد" من انتاج MBC بالتعاون نادي الإبل قد قدم جائزة الملك عبد العزيز للشعر الشعبي لخدمة هدف الحفاظ على المخزون التراثي الغني للمنطقة