#أزهرينا

🟥🟥 اتقاسموها رُتب رُتب ✍🏻 أزهري محمد علي #أزهرينا Azhari Mohmmed Ali يا دي البلاد الكل ما طايبتها فتحت علي جرحك جرح.. والكل ما نقطت لها الكلمات عسل نزلت علي خاطرك ملح.. يا دي البلاد وين نحنا هسه في ياتو ليل في يات صباح كل الشوارع تشتبه فيك وتشابه بعضها.. كل البيوت الواقفة طولك تستبيح في عرضها.. وأنا روحى تشتاق لي بلاد كان طينى من طين أرضها.. ديك البلاد اللا بتفوت فيك وقت لا يوم بتترك فرضها.. يوماتى واصلها بالحنين يوماتى هى الفى النوم تجيلك برضها.. اشتقت ليها الشوق غلب.. واشتقت انزع همى فى عتبات بيوتها الواسعه وانزع فى ضل عصاريها التعب.. غنيتها بي أدب المديح سمّت غناي قلة أدب.. ومشيت وراها ضريح ضريح فتّشت في كل القُبب.. دقشت ورا الرزق الشحيح ما أغنى مالها وما كسب.. شغلوها بالنبي والمسيح واتقاسموها رُتب رُتب.. في كل حِتّة حصار حصار في كل فِجة لهب لهب.. صمدت أمام وابل الرصاص وسقطت أمام وابل الخُطب.. #ديسمبر_باقية_وستنتصر #السودانيون_يستحقون_السلام