العراقيين ليسوا أمة منفلتة إلى السيد المستشار إبراهيم الصميدعي أستاذ إبراهيم، بالبداية، رأيك محترم وهذا حقك، وبحكم قربك من السيد رئيس الوزراء محمد شياع السوداني، وعلاقتك بيه كصديق ومستشار وناصح، وبحكم خبرتك الطويلة بالعملية السياسية قبل 2003 ولحد اليوم، ما نختلف إنه عندك اطلاع واسع. أنا شخصيًا أتفق وياك... إنه قبل كم سنة كنا نطالب بمشاريع كبيرة: جسور، سدود، شوارع، أتمتة دوائر، محاربة فساد، وتطوير التعليم. واليوم، حكومة السيد محمد شياع السوداني فعلاً أنجزت مشاريع مهمة: بناء مجسرات، تبليط شوارع حيوية ببغداد وبالمحافظات، مشاريع للكهرباء، وبالأخص مشروع محطات التوليد اللي رغم إنها تحتاج 3 إلى 7 سنين حتى تنتج، لكنها خطوة صحيحة، وأتمنى لو كانت بادية من أيام المالكي أو العبادي. ومن المشاريع اللي أنا أشوفها مهمة، مشروع معسكر الرشيد وتحويله لمنطقة خضراء، وإن شاء الله نشوف التشجير يعم بكل مناطقنا و كري الانهر كذلك والاستمرار بمشروع تحلية مياه البصرة اللي ايضاً أفتتحه مؤخرا لكن، أستاذ إبراهيم، هذا مجمل إنجازات الحكومة خلال 3 سنين، وهذا ما يبرر إطلاق ألقاب ملكية مثل “سمو سيدي” على رئيس الوزراء، لأن إحنا مو مملكة ولا عدنا ولي عهد ولا أمراء. إحنا عدنا ناس ننتخبهم ويتغيرون كل 4 سنين حسب الدستور. (واذا نطلق هاي التسميات فما حاجة لنا بالانتخابات) فإذا اليوم نكول “سمو سيدي” لمحمد شياع السوداني، باچر عگبة إذا إجا غيره وأنجز أكثر، شنسوي؟ راح تطلع بالتلفزيون وتطلب ان نسمي “المهيب”؟ أو “الأمير المفدى”؟ هذا مو منطق. والأهم، كلامك عن “الأمة المنفلتة” غير مقبول. الشعب العراقي مو منفلت، هذا شعب قاتل د١عش، وطلع بتشرين يطالب بحقوقه، وانت كنت مساند إلهم، والشعب اللي وقف بوجه الفساد، واللي نزل بالشوارع تحت حر الشمس حتى يناصر غزة، واللي تحمل الظلم سنين، تحمل فساد كبير بحكومات مختلفة كنت انت قريب من اغلبها، مو احنا "ابناء الامة المنفلتة"!! الامة المنفلتة تحترم القانون ومطالبتنا الدائمية هي بفرض القانون على الجميع والقضاء هو الفيصل دائما أستاذ إبراهيم، أتصور بهالتصريح أخطأت، والمطلوب منك اعتذار للشعب العراقي، لأن هذا الكلام تجاوز. وأتمنى من دولة رئيس الوزراء (وهذا صفته وما يليق به بكل احترام) أن يحاسب أي إساءة بحق أبناء بلده..show more

Yasser Eljuboori - ياسر الجبوري

88,900 subscribers

分享 下载