حارس الثلاجة بالمسجد !

سالفته تافهه مثله…!! الواحد يحط الماء صدقه لوجه الله خل الي يأخذ يأخذ هي الدعوه ماء سبيل لوجه الله مو عشان تمنع الناس وتراقب هو كله لوجه الله هذا طفس ومنان الله الغني عن كرتون الماء الي تحطه تقول بقاله مو مسجد يراقب غبي والله

ذليت المسلمين انت والماء حقك ذا مابقى الا تنام عند هالثلاجة اخرتها علبه ماء ام ربع ريال

إذا جعلت الماء سقيا و سبيلاً فاغضض البصر واجعل الفقراء يأخذون مابدى لهم وعلى هذا الحر الشديد لا يكفي واحده ولا اثنتين ولربما لا يسد عطشه ثلاث وهناك من عمله شاق في لهيب الحر وما أروع الكرم وخاصة في الصدقات ﴿ يا أيها الذين آمنوا لا تبطلوا صدقاتكم بالمن والأذى﴾

اللهم لك الحمد يترك الصلاة المفروضة ليراقب " صدقته " أي صدقة تلك ؟!!! ويصلي على باب الثلاجة وتحصل بينه وبين المصلين فراغ كبير لأن الثلاجة عادة بآخر المسجد ! أي صدقة تلك ؟!!! وافتح فمك وورني لسانك > استغفر الله ويتبجح بذكر هذه القصة !! الله يجعلك ماتولى أيتام

اعوذ بالله منه .. انت حاطه ديكور؟ حاطه عشان المسلمين ياخذون .. اجل افتح فمك وتشوفه ناشف عشان تعطيه مويه؟؟؟ دايم اقول الحمد لله ان الرزق على الله مهوب على البشر مثله

المسلم اذا تصدق يرجو الاجر من الله تصدق وضع الماء في مكانه الصحيح ليأخذ منه المحتاج وهنا كتب لك الاجر ولست مسؤول عن من يأخذه ان كان محتاج او لا لأنك ابتغيت الاجر من الله احيان يكون المحتاج الماء من الأغنياء او من يريد اكل علاجه بالسيارة او الماء بارد ويريد تسخينه ليشربه

يعني على بالك الحين أنكت كسبت حسنه تصرفك هذاغيرمقبول من وجّهت نضري وش افتح فمك سكرفمك هذي ماهي صدقه

هذا يطقطق مهوب من جده

صراحه ماعندك سالفه لوني منك اودي كرتونين الماء لبيتي واحط رقم جوالي على الثلاجه واللي يبي الماء يتصل عليك وتواعده في مكان عام وتكشف عليه قبل تعطيه الماء ومن ثم تعطيه الماء وتاخذ الفارغ 👍👍👍👍🤔🤔

يستهبل ويدق على اللي تكلموا على اللي ياخذون كميات كبيرة مشكلتنا سلاح ذو حدين يانخلي الموضوع بحري ولا نقفل مرة وحدة انا شايف عامل شرب وعبا مخابيه تقريبا ثلاث او اربع وناوي ياخذ زيادة ، قلت خلاص خل غيرك يستفيد ، هم للأسف يشوفون الكميات يحسبون الموضوع مسموح تاخذ لبيتك كميات

الماء لوجه الله يعني وش عليك ياخد 2 و لا 9 في الاخير هو راح يستفيد فينها شخصياً و انت أجرك على الله. المشكلة بكل بجاحة طالع يسولف الله لا يجعل حاجة مسلم عندك

الرجل جزاه الله خير ينتقد بأسلوب ساخر بعض جماعة المسجد الذين يتصدقون بعبواب الماء ثم يؤذون الناس الذين يأخذون من هذه العبوات بعدم أخذ أكثر من عبوة واحدة حتى لو كانت أبو ربع (200) ملل ، وبعضهم يضع ملصق على باب الثلاجة مكتوب فيه ( الرجاء أخذ حبة واحدة) . لقد نسوا قوله تعالى :( يا أيها الذين آمنوا لاتبطلوا صدقاتكم بالمن والأذى ) . شكرا لهذا الشاب وقد وصلت رسالته لكن البعض لم يفهمها وكان عليه التوضيح أكثر .

ذليت المصلين بها الماء

ياجماعة الكلام مو على اللي ياخذ حبة او حبتين انا قدامي العامل شال كرتون كامل 24 حبة و اخذه للسكن و هذا ما يجوز

الواحد يفرح يشوف الناس يستفيدون من صدقته أو إكرامه!! وهذا يمن بها عليهم!! ثق: لن يأخذ الماء إلا محتاج، حبة حبيتين كرتون، يشربها يبيعها يطبخ فيها؛ لن يأخذها إلا محتاج لها فأحمد الله، وهذا سقيا وصدقة بنيتك، ولا عليك منهم!

هههههههههههههههههههههههههههههههههههه هذا اللي يدفع الصدقه ويلحقها بالمن والاذى ترى الهنود والبنقال حتى لو اخذو حبيتين ثلاث انت ماجور لان مافي بغرفته شي لكن انت نيتك صدقه عشان السعوديين والسعوديين مو منتظرين منك صديقه

قال الله تعالى ﴿ يَا أَيُّهَا الَّذِينَ آمَنُوا لَا تُبْطِلُوا صَدَقَاتِكُم بِالْمَنِّ وَالْأَذَىٰ كَالَّذِي يُنفِقُ مَالَهُ رِئَاءَ النَّاسِ وَلَا يُؤْمِنُ بِاللَّهِ وَالْيَوْمِ الْآخِرِ ۖ فَمَثَلُهُ كَمَثَلِ صَفْوَانٍ عَلَيْهِ تُرَابٌ فَأَصَابَهُ وَابِلٌ فَتَرَكَهُ صَلْدًا ۖ لَّا يَقْدِرُونَ عَلَىٰ شَيْءٍ مِّمَّا كَسَبُوا ۗ وَاللَّهُ لَا يَهْدِي الْقَوْمَ الْكَافِرِينَ﴾

الرجل ينتقد هذا الأسلوب لكن بعض الناس ما يدرك هذا ويتوقع انه يطكر قصة حقيقية! وانا اؤيد مايهدف له لكن أسلوبه في الكلام لايفهمه الكثيرين وهي نقد الفعل بتوصيفه كانه الفاعل

توقعته يقول المرة الثالثة حطيت سم في المويه او بلغت مجلس الامن الدولي لضبط حركة الملاحة تبع مويته او ربع ريال يارجال اللي ياخذها يشرب بالعافيتين ولك اجر اهم شيء مااحد ياخذ الكراتين يبيع بالتنسيق مع بعض عمالة المسجد

هذي فتوى الشيخ جزاه الله خير لكن وش تسوي مع هالعماله

طيب انت جايبها لوجه الله ليش تتمنن بصدقك هذي. ، المن والاذى بعد الصدقة من الكبائر التي تبطل ثواب الصدقة وتذهب أجرها. وقد حرم الله سبحانه وتعالى ذلك في القرآن الكريم، وبين أن الصدقة الباطلة بالمن كحجر صفوان عليه تراب أصابه وابل فتركه صلداً.

الشاب هذا ينتقد الذين يمنعون من ياخذ اكثر من عبوتين لكنه بالغ حتى ظن السامع ان هذا رأيه الشخصي ،، والمقصود انه يسخر من الذي يتصدق ثم يدقق على الناس

انت جزاك الله خير، أنت تصدقت بالماء والله يكتب أجرك المفروض انك تضع الماء بالثلاجه وتقول اللهم ان هذا الماء في سبيلك ورضاك فأعطيه لكل محتاج ثم تتصرف، وكلما شفت الماء خلص من الثلاجه تفرح، وتضع كرتون ماء أخر،، وتواصل سقيا الماء فأعلم اخي في الله أن كل انسان يأخذ نصيبه فقط،

لا لا جبت ماي حط فراشك عند الثلاجه ولي يبي ماى طلع السانه وشوفه اذا ابيض وبراطمه يابسه تراه قاطع له طريق مشي هذا يستحق الما علي قولتك سالفتك ليتك بركت عليها وسكت

هذا تقله الله لا يعطيك العافيه فوق تعبك انت جبت بالماء ليش الا عشان الناس تشرب مو شغلك من الي ياخذه وهل هو عطشان والا لا انت فاتح بقاله والا تبي الصدقه الله لا يكثر من امثال هذي النوعيه خل فلوسك في جيبك بدل المنه ذي

من خالك يا ولد من خالك ولا تجيب سيره السعودي هل تظن ان السعودي الذي سيشرب الماء ولا تريد العماله يشربون الماء ان تسيء لسمعه السعوديين بشكل عام وانت ليس كفو انت تتصدق الله لا يكثر من امثالك.. اين انت سوف نرسل لك بدل كرتون واحد 100 كرتون دلني اين مكانك سنعوضك على ثلاث كراتين ب 300

بغض النظر عن اللي سواه انا حطيت برادة جنب بيتي عن ابويا الله يرحمة واعبي خزانها موية تحلية نظيفة الصراحه بعد فتره كشفت العمال ياخذون جراكن ويعبون منها ويودونها للمحل تبعهم والمحل يبيع عصيرات لكن بعدها حطيت شبك عليها وفتحه صغيرة يخرج منها الكوب وقلت لو اشوفكم عندها كسرت رجولكم

ههههههههه طيب هذي هي الغاية من الصدقة الا اذا كان الصدقة غير مخصصة للعمال المطحونين ! ما تدري هي دلاخة ولا عنصرية

انا مره جبت مويه وعشان ثقيل اشيل الكرتون بالطريق ف قلت اجيب من الكراتين الصغيره والصدق كنت فرحانه كان نفسي اسوي شي كذا صدقه و حطيتها جاء عامل شال الكرتون وراح 😕😭😥 صح هي صدقه والله يكتب اجري لكني انقهرت مره هههههه المهم صرت احرص اذا جبت افتح الكرتون بحيث ما يقدر يشيله ويروح 🤣

مدري هو يمزح ولا صادق انت حاط الما لمن ؟ انا معك لو اخذ كرتون كرتونين هنا تتكلم مع انه ممكن يوديهم لبيته ويشرب ويحسب لك الاجر ، لاكن مع هذا صح فيه بعد المصلين يبون وهذا ممكن يكون ضرر لاكن حبه وحبتين وثلاث يشربهم اعتقد انت مكبر الموضوع احتسب الاجر وبس

ههههههههههه استغفر الله …. خلهم ياخذون انت اجرك ان شاء الله انه وصل

اتمنى محاسبته والتحقيق معه لاني اشك ان يفعلها مسلم عاقل اتوقع يمزح هذا يمكن ينام عند الثلاجة بين الفروض الخمس

معقولة كل اللي ردوا ما فهموا قصده من السالفة!!!؟ العرب أول يفهمونها على الطاير، له مقصد من كلامه ، وأنا واحد فهمت كلامه ، وجزاها الله خيرا على التوعية، هذه مشكلة نعاني منها في بعض المساجد للأسف "حارس الثلاجة"

يا الله لا تبلانا افتح فمك ليه الأخ طبيب أسنان شر البليه ما يضحك خربت فريضة عشان سنه الله يهديه ويصلح حاله