شاب يشارك: بعض الناس عندهم ترابط اجتماعي غريب عندهم تواصل زيادة عن اللزوم تجلس تسولف مع واحد يقولك انا معزوم عن رجال خالتي! انا خالتي من يوم تزوجت معاد شفتها هي بنفسها موب عاد رجالها ولا اللي يقول معزومين عند زوج بنت عمتي يعني ليه تتواصل معه من البداية!؟

الغريب والله اللي يدخلونك مجالسهم و هذي سوالفك

واضح شخص محدود تفكير، ما يفهم قيمة الترابط ولا يقدّر الناس ، بالعكس، هذا دليل على مكانته عندهم، مو أي أحد يعزم أو يتواصل معه بهالطريقة. العلاقات هذي تعني تقدير، مو زي ما تتصور إنها زيادة مالها داعي .

وربي ان ذولي الناس اللي ربي منعم عليهم تبارك الله ماعمري قابلت بنت عائلتهم متحابة الا وربي رازقهم ومبسوطين الله يزيدهم لكن عائلتنا المتقاطعة كل عيالها دمار والوضع المادي ⬇️⬇️⬇️ قال رسول الله صلى الله عليه وسلم ( من سره أن يبسط له في رزقه وينسأ له في أثره فليصل رحمه)

ولا يجيك واحد يقول طالع مع خويي انت من متى تطلع برا البيت عشان تروح تقابل لي خويك؟

محد غريب غيرك انت ونظارتك المربعة تحسب صله الرحم امك وابوك وجدك وزوج اختك وعديلك بس احب الي كذا يجتمعون حتى لو بالسنة مره موبس زواج او في عزاء تشوفهم

من عيوب السوشل ميديا يطلع لك واحد مثل فكر هذا وعقليته وينظر على المجتمع . التواصل مع الناس والتازور والألفة نعمة عظيمة يحسد عليها العرب كافة . وين المشكلة؟ بينهم تواصل ولو ما بينهم تواصل ما اجتمعوا يا عبقري . فيه أحد يزور أحد ما يزوره . مثلها مثل عزائم الاستراحات والكافيهات .

مرفوض أي أحد ينظر في العلاقات الاجتماعية تواصل مع من تحب وأحب حياتك واحرص على أقاربك وأنسابك وارضهم دون الإساءة لنفسك وما عليك من هالنفسيات اللي ينظرون من مبدأ عقدهم النفسية

انصدمت من المقطع على بالي كذا النظام في السعودية ولكن الحمدلله قريت التعليقات وجلدوه جلد وتأكدت اللي في المقطع حاله شاذه لكن الشرهه اللي ينشر مقاطعهم

متى صارت صلة الرحم تواصل زيادة عن اللزوم

بعض الناس يبغى يطبق وضعه على الجمييع؟؟؟ الترابط الأسري العميق سمه إيجابيه وليس سلبيه يارجل الحارة المترابطه او الجيران الي يعرفون بعض و مترابطين أفضل من الي مايعرفون بعض ومن حميع النواحي

في الغالب هذي اسر اسمها (الاسر الكبيرة) يعني تجد ان جدهم واحد وتحت اولاد واولاد اولاد وكلهم متزوجين من بعض تلقى الاخوال في الاساس كانوا اعمام من الجد الاول والعكس كذلك لذلك في الاساس هم قرابة فاذا مازراه عشان نسب بيزوره عشان القرابة الاصلية

لا غريبة ولا شي انت الغريب، خالتك وبتعزم اختها امك، وبنت عمتك بتعزم خالها ابوك فطبيعي العزيمة للرجال تجي من الرجال، ومعظمهم اصلا تحصل ازواجهم من نفس الجماعة وفيه سابق معرفة وعلاقة زينة من قبل الزواج والنسب، انت شكلك ما تروح الا عند اخوك بس وبعزيمة بعد

لعن الله هالشوارب ، قاطع رحم خسيس .. يعني عيب تزور جماعتك وربعك ولو عزمك زميل عمل ولا مديرك عادي وتروح جري !!؟ ناس قذره صدق

كل كلامه ماشي الا كلمة خالتي ماشفتها من عرسها علشان اشوف رجلها هذا قطع رحم زيادة عن اللزوم

لا ويجيك واحد يروح اول عيد لعمانه وثاني عيد خواله وييين ما يستحون ياخي من يوم ابوي تزوج امي وانا ما اعرفهم كلهم

أنت ليش معك جوال اصلاً!

ابناء العم وبنات العم وابناء الخال والخالة وان نزلوا هم من أولي الأرحام الذين يجب صلتهم (وأولوا الارحام بعضهم أولى ببعض )

زورو من تحبون ويحبكم سوا من قريب ولا من بعيد ولا تسمعون للناس اللي عندهم سلبيات أو مشاكل مع اقاربهم او جيرانه او بعض اصدقائهم لان هولاء يبونك تحارب كل شخص يكرهونه ولو ما قطعت العلاقه معهم يصير خلاص يكرهك فيه مثل يقول يا صديقي ليس عدوك هو عدوي

والله اللي لاحظته ان الجميع يريد يثبت للجميع ان عنده علاقات اجتماعية .. خوفا من انتقاد الاخرين. ...الا في الحقيقة ما يفرقوا عن بعض كثير فلا تدققوا كثير في حملات الاستعراض ايام العيد..

هذا فاشل

أي صدق حتى اللي يسلم على أمه و أبوه ياخي فعلا ترابط غريب

خلاص اشش درينا انك حضري !! هذولا اللي يسولف عنهم غير انهم اخوانك المسلمين اللي في ادخال السرور على قلوبهم اجر كبير هم ايضاً بينك وبينهم صلة رحم، وخالتك تزوجت ماتدري عنها والله من الطقاعه اللي براسك..

اتوقع هذا من ذيك القبيله اللي عندهم عيب يحضر زواج اخته وعيب يبارك لها ويوقف معها لدرجة انهم بليلة زفاف بنتهم منكبين على وجوههم ببيوتهم ومقفلين الابواب تقل هاربه بنتهم او تقل مخطوفه

طعس ليه مستغربين

كل السلق اللي يلبسون نظارات سوالفهم غبيه

هذا مو شاب يشارك .. هذا جاهلي يشارك

اذا خالتك ماتشوفها ف الله يخلف عليك ، ثانيا مهو شغلك خل الناس تجتمع

وللأسف جانب الصواب، ولو جدانه حيين وسمعوا كلامه ردوا عليه. توجيب الناس من المروءة ومن الأمور التي دعى لها الشرع، اذا دعاك فأجبه، أما كلامه فبعيد عن الصواب هدانا ﷲ وإياه.

انت اللي ما عندك ترابط اذا خالك ما شفتة

صحيح والي كذا سبحان الله تلقاهم كلهم الله رازقهم بوظايف نادر تلقى واحد ماعنده وظيفة

بسيطة الي يحب كذا هو وما يرتاح عليه وين المشكلة الأمر فيه سعة

ذا ابلشنا فيه دودة اثارة جدل لازم تطفي

وش دخلك في الناس يامسلم خليك في حالك

أنا انعزمت عند زوجة طليق ام زوجي وكانت معاي ام زوجي وبناتها وسلفاتي الأنسان ينجذب للروح السمحه والسعيدة من الداخل ويرتاح ويختار قربها ليزداد سعادة وسماحة وحب ❤️ ليش العجب !!

طبيعي يقول هالكلام هذا من ربع اللي ما يحضر زواج اخته