(قصة أحمد) تعالوا أحچيلكم قصة واحد أسمه أحمد .. أحمد شاب بسيط نام وهو مؤمن بفكرة وگعد لگة نفسه مؤمن بفكرة ثانية مختلفة جداً .. اذا تكدر تسأل احمد وادكلة "أبو شهاب ليش بدلت قناعاتك؟!" راح يكلك والله أني بدلت لان اني حر وافكر والتفكير يغير القناعات مرات ،... كنت اشوف الصح بطريقة اهلي واخوتي وبعدين شفت الصح بطريقة ثانية .. وبالنهاية هاي افكاري الي أمنت بيهة. طبعاً هنا أني راح أصدك ابو شهاب لان بالحقيقة هو شخص ناجح وعنده منجز ثابت وحقيقي دون النظر الى افكاره وقناعاته ، ما بدل مواقفه حتى يستفاد او يحقق شي. رجل كان يلعب طوبة وصعد فريقه لكاس العالم وسجل الهدف الوحيد للعراق بال ٤٠ سنة الفاتت. طبعاً دا احجي عن احمد راضي ومالي علاقة اذا بالكم راح بعيد … ها خاب أملكم وتريدوني أحچي قصة أحمد ثاني؟ تدللون .. أكو أحمد ثاني هم نام مؤمن بفكرة وكعد مؤمن بفكرة ثانية .. كان يحچي بالحريات والحقوق والثورة ومعارضة السلطة .. وگعد وهو يتلوك ويتمسح ويگدي القبول والرضى من أي فاسد .. طبعاً هم اذا تساله ليش بدلت ابو شهاب؟! راح يكلك أني بدلت لان اني حر وافكر والتفكير يغير القناعات مرات. بس طبعاً هذا الاحمد ما اكدر اصدكة لو يوذن .. ببساطة لان هذا ما مؤمن بأي فكرة ، هذا مجرد واحد فاشل رغم كونه وجد الطريق لواحدة من اجمل دول العالم ، بس لان هو تافه مثل اي دجاجة تموت وعينهة ع الزبل ، قرر يبحث عن رزقة يم الفاسدين.. شاف هذولة منو وشنو افكارهم وراح كال اخوان اني بدلت وصرت افكر مثلكم .. الحشد زين والميليشيات تجربة عالمية ، والولائية خوش ناس والرهبر مو اخ وانما تاج راسي ، فممكن تشغلوني وتنطوني كم فلس امشي بيهم نفسي وامشيلكم كلاواتكم ع الناس؟! تافه ، لا تعب ، لا منجز ، لا افكار ، ولا حتى هدف بالمكسيك يبقى بذاكرة احد .. مجرد واحد ذل نفسه واهان كرامته ونزل من قيمته على أمل تتبناه جهة بصورة مستمرة ويحصل فد كي كارد .. وطبعاً اني دا احجي عن احمد عبد السادة الي كان عايش بلبنان حسب ما اتذكر .. هااا ! خوما هم خاب أملكم وتريدوني أحچي قصة أحمد ثالث؟ للأسف أخوان لهنا واني أعتذر منكم .. لان بصراحة أني واحد وهمي وجبان أكدر أطلع عضلاتي بس على الرجال الي من يترزل يجي هو بنفسه يتعارك وياية ويشتم ويهدد ويهوس .. اما انصاف الرجال الي من ترزلهم يختلون ويخلوك بوجه نسوانهم الي تتعارك وتسب وتشتم وتقل أدبهة بمكانهم ، هذولة كلش أخاف أحچي وياهم .. فلهنا وكافي. اما بالنسبة للفديو فمع بداية المونديال ما لكيت شي يذكرني بالمرحوم أحمد راضي افضل من فديو احمد .. وبالنهاية الله يرحم احمد الميت ويهدي احمد الطايح حظه ويوفق المنتخب بمسيرته بالمونديال. #ادم_عراقshow more

لا يلام.. فهم اخيرا ان هذا الشعب لا يستحق ان تدافع عنه بل يجب ان تستفيد على حسابه.. لم اعد الوم لا احمد ولا علي ولا جبار.. بالنتيجة. كلهم عراكيين..

ديلا يوسف محرم ع الابواب ، عوف الالحاد وخلي نلبس اسود ونفتح مساحات تحجي شلون انتصر السيف على الدم ، اتحداك نسويهة 😜

أخوان اني ذاكر احمد راضي واحمد عبد السادة ، رجاءاً لا تجيبون اسماء غير ناس لاسبابكم الشخصية ، مابية حيل من ورة تعليقاتكم الكة نفسي بأجتمعات امهات رحمة لوالديكم 😀

اول ما غير قناعته وراد يثبت ولاءه للفاسدين العارات حظرني علما شكد دعمته هو ومرته الخبله الي تمشي وتهمش وتضحك على شكم زعطوط فالله يطيح حظ احمد وامثاله واتمنى اي واحد مثله يحظرني ويخلصني من شكوله وشره لاني ماااسكت ولا ارحم هيج متلونين رخاص

شكد جنه سُذج من نكعد ساعات طويله نسمع ناس تدعي انهم ينتمون لتشرين

هذا التافه اشتروه الاحزاب وصار يلمع للاسلام السياسي

اذكر جيداً تسجيل صوتي لأبو معنى (علي وجيه) عندما رأى احمد لأول مرة في بغداد صدفة و انهال عليه بالقدح و الأهانات المباشرة، حينها كنت غاصب من علي و قلت من الطبيعي أن يفعل علي هذا، فهم خصوم في السياسة وبينهم خلافات شخصية كثيرة. بعدها بسنين تيقنت إن كثيرا من كلام علي وجيه صحيح 😕

احمد وغيره من الشباب العراقيين وغير العراقيين تبدلهم افكالهم بشكل طبيعي بعد الي صار في اكتوبر 2023 وبعد الحرب الكبرى بالمنطقة.. عرفوا وافتهموا السالفة والاهداف الخبيثة الي يراد لها ان تطبق بالعراق مثل ما طبقوها ببلدان اخرى.. فقرر احمد بكل ادب وبدون تجاوز حلى احد ان يكتب وينشر افكاره وقناعته لكن واجهتوه بالسب والشتم والطعن ومنشوراتكم تنگط سم وبدون اخلاق.. تريدون الانسان العراقي يكون ممسوخ ضد وطنه حتى ترضون عليه.

طبعا اني دا اسال نفسي اذا اطب لصفحتك هسة شنو اول صورة الكاهة منشورة عندك؟ خامنئي لو سليماني لو المهندس؟ 😂

خامنئي العظيم رضوان الله عليه. تتوقع ان نخجل من هكذا شخصية عظيمة؟ هذا الانسان هو فخر لكل مؤمن.

لا حبيبي انت حر ، اني ادعم حرية التعبير انت من حقك تسمي الخامنئي عظيم وتعجب بكل ذيولة وانيمن حقي اتبول علي خامنئي مجازياً وانصب على كل ذيولة بس مهم جداً عندي ان تكون توجهاتك واضحة للناس الي تقرا ردودك حتى يعرفون بالضبط منو ديدافع عن منو . تحياتي

كل الاحترام لك استاذ ادم و للاخ استاذ احمد صاحب الفيديو. لكن تشرين كلاوو لا فكرة و لا مبادئ و لا قيم ، راحت بيها شباب دمها حامي مع الاسف و الله يرحمهم و صعد براسهم ناس آخرين. اني أحيي الاستاذ احمد الحسني لان غير فكرتة و اكتشف ان تشرين كلاوو.

عادي اعتبرهة القضية الكردية ومشيهة ، شو هم حروب وضحايا وناس صعدت براسهم وصارت عوائل مالكة … وعود وجه تحياتك للاخوة اكراد العصائب وضيوف قناة العهد لان اعتقدوا القضية الكردية كلاوات

محاولة ضعيفة اخي ادم للتشبيه. القضية الكوردية قضية شعب و اهدافها واضحة و نتائجها موجودة. اما تشرين الاخ احمد الحسيني وصل الى قناعة تامة ان تشرين كلاوو كما وصل اخرين كذلك منهم خالد ابو عراق و مشرق الفريجي و غيرهم الكثر.

اي نتائجهة موجودة … حرب عصابات لسنوات انتهت بهزيمة وتسليم سلاح بتركيا ، همبلة وسيطرة انتهت بانسحاب مهين امام سيطرة الحكومة بسوريا بطش واعدامات بالجملة للاكراد بايران وانقسام بكردستان العراق ما بين جزء يحكمه مدمن كوكايين وجزء تحكمه عائلة ملكية صارت من اثرى عوائل العالم بينما شعبهم بلا رواتب. بشرفك سد النقاش وعوف تشرين حتى لا انجبر احجي كلام يزعلك مني بعدين

طبيعي جدا كل الامم ترى في اثناء كفاحها كثير من الحروب والصراعات و لكن تبقى، فاوربا حدث بها حروب وابادات و كذلك امريكا حدث فيها حروب على لون البشرة لكن كفاح هذه الامم بقي. على عكس تشرين التي لا تقارن بقضية الامة الكوردية،حركة تشرين انتهت و لم تبقى واشجعها البطل خالد ابو عراق

تتوقع منو باك من فلوس الشعب اكثر؟ ابو عراق لو البرزاني؟ 😀

مبروك بالتوفيق البارحة واحد من جماعة الاطار في لقاء قال ما قاله احمد: انتم ليش تحجون عالحشد مو هاي امريكا بيها حرس وطني. غيّر قناعته جان جاك روسو عود هو، هن خلالات العبد واحد يبوك من الثاني محتوى، وغارقين بالتكرار والملل.

توارد خواطر 😉

رغم ان الانسان حر يغير قناعته بفلوس او بلاش، بس اني اؤيد المنشور، لان احمد چان ناصب محاكم على اي واحد حتى لو رايح للرضا يگول عليه ذيل، و بالتالي هو لازم يتحكم بنفس المحكمة الي سواها، و لو هو ميسوى بالحالتين

والله ماكو غراب غيرك انته صرنه نتقزز من صوتك هلگد ما بعت علينا كلاوات ، بضاعتك فاسده وبعد محد يشتري ، يمكن بس شمس لان مجبوره لازم تثبت ان قرار انتشالك لاوربا كان صحيح 🌚🌚🌚

احمد جوز الست

احمد الحسيني اول مطلع على الفيسبوك ما بلعته لحد انشرت سكريناته ب٢٠١٧ وهو يشرح للبنات الربط بين الانفجار الكوني والنودز .

هاي شنو! ما سامع بهل قصة اني 😀

شعجب طشت طشة قوية وقتها

اني جنت بغيبة كبرى

سلام الله عليك

هواي ناس صنفوا نفسهم على انهم تشرينين لانهم يحبون يركبون الموجه بفترة 2019-2022 الي يحجي على تشرين يشكون حلكه وهسه كلها صارت ياا استوعبت تشرين مو زينه نننن وهي نفسها نفسها كلشي متغيير بس هاي نوعية ماعدها مبادئ تركب اي روجه.

كلامك ذكرني بهواي ناس استفادت من اسم تشرين ووصار دكان وتاجروا بيها هاي من غير كروب مشرق عباس ونفسهم هاي الناس تصدروا الواجهة الإعلامية لتشرين وكانوا يقبضون من الأحزاب السياسية نفسها اني مؤمن بهذه الفكرة لحد الممات أنه هذه الأحزاب كلها حرامية وهتلية مبادئي ماتغيرت

اشتاقينالك ادم ❣️ welcome back

خايف انام الصبح اصحى بالليل ادخل تويتر اشوف ادم يشكر ابو تراب وابو تراق وابو سريوه كلش خايف من هاي النومة

تاج راسك الابهات كلهم 😀

هههههههههههههههه

القصيده عاجبتني ماعندي قصد بيها …😎

ماشي نريد منك تغريدة عن خالد، مو خالد بن الوليد ولا خالد العطية لا لا نريد عن خالد ابو عراق المحمداوي وشلون انكلب😆

الشمس في كل الكون تشرق لتكشف الحقائق وتنير الدرب، إلا في العراق... 'شمس' تتدخل لتغطي على الظلام وتدافع عن القتلة. عندما تدافع 'الشمس' عن ظلام الميليشيات، فهذا ليس دفاعاً، هذا يسمى 'كسوفاً أخلاقياً. طبعا هنا اقصد الفنانة شمس…

عطلات اذكرهم من ايام القسم الداخلي عدنا مجموعة ملطلطين يومية داگين باب مسؤول يروحون يتلوگون الهم حتى ينطونهم ١٠ الاف ويرجعون

وين هل غيبة

عاشت ايدك

يللي مثل أحمد راضي خلصو بعد ما طبت الدبابة الأمريكية ويللي مثل عبدالسادة اصبحو اليوم ذات مكانة وقيمة وقدر بعد ما سرقو العراق وباعو وتاجرو به خصوصا عندك نسبة كبيرة من الشعب تتلوك وتمسح وتكدي وتحب تاج الرأس حتى ركب على ظهرها ومدد رجليه...

إي يا اخي الحرس الوطني مثل الحشد ليش ما سمعت من گالوا لأوباما " إذا ما تجر عدل نگص اذاناتك يا زنجي " لو ما شايف من يوكفون الناس بسيطراتهم بكاليفورنيا

مفتقديك ابو هابيل

لكل شيء ثمن

هههههههه عظيم

👌🏻👌🏻👌🏻👌🏻عاشت ايدك

هاي صدك عود واحد يغير موقفه علمود الكي كارد شطلع هذا الكي كارد هو خلك مليون ونص معقوله واحد يذب كرامته عليها

شنو فايدة الفلوس وعلي وجيه شايل الشحاطة وحالف وين ما يشوفه ببغداد يطبع رقمها على وجهه؟

الانسان يحتاج يسوي مراجعة فكرية و ممكن يغير قناعاته ؛بس الأهم انه يكعد بالبيت و يتأمل الافكار الجديدة مالته و ما يسلفنها للناس و يبيعها على أنها الحقيقة المطلقة. و هاي مو ديكتاتورية أخلاقيةبل هي دفاع شرعي عن الوعي الجمعي. بدونه، يتحول الفضاء العام إلى مسرح كبير للمهرجين.

يرادلها خدمة اختصار التغريدة 😑