معلمة توثق خروجها للدوام في الساعة ٢:٤٥صباحا..

فلسفة بعض التعليقات وجهلهم المركب تتعجب منهم هل هو حسد ولا كره ولا تخلف... المعلمين والمعلمات عندهم أسر صعب السكن في مناطق نائية أو أصلا لا يوجد سكن وقد يكون غير مناسب. معاناة المعلمين والمعلمات في الغربة لا يشعر بها أحد إلا من جرب وعرف قد ايش التعب والمصاريف... الله يرزقهم النقل

والله حرام المفروض اي معلمة تدرس في منطقة غير منطقتها يكون فيه زياده في راتبها اقل شي 5000ريال زياده وقليله في حقها

وش حادها على المشاوير تسكن في مقر عملها سواء قرية ولا محافظة ‼️

اللي جالسين يقترحون اقتراحات بالمنشن ما جربوا يروحون ديار و قرى شبه مهجورة امسك خط الرياض مكة و شوف كم عدد المدارس في الصحراء في قرى صغيرة جدا لا تكاد ترى إلا بعد الزوم بل أن بعض المدارس عدد طلابها ما يتجاوز ٢٥ طالب !! كلام السعة كل واحد يقوله لكن لو جربتوا عرفتوا

والله كنت اقطع كل يوم ٦٠٠ كيلو ذهاب وعوده لمدة سنتين ماكنت اقدر اسكن في نفس منطقة العمل وكنت اضطر للعوده للرياض كل يوم. ايام عدت الله لايعيدها. المقصد لحد يتكلم ويقول ليه ماتسكن لانك ماتدري عن اوضاع الناس ولااتخذت هالخطوه الا هي المناسبه لها رغم ضررها

ويجي واحد راسه مربع ويقول المعلمات والمعلمين والله كنت اطلع قبل الفجر واوصل بعد العصر البيت

بعضهم يتفلسف ويقول ليه ما تسكن ما يدري ان بعض المدارس موجودة في مكان مقطوع وغير مخدوم وخالي من السكن الا لافراد الهجرة

والله يافيه كمية ردود. اقل مايقال لها وقاحة لكن الله يصلح حالنا وحالكم يارب 🤲

@moe_gov_sa @minister_moe_sa يمكن معاليك قلبك يحن شوي وتغير قرار التعيين المكاني المجحف بحق معلمي العقود . والله ان هذا القرار غير منصف وفيه اجحاف بحق معلمي العقود فمتى يلغى القرار ويرتاح كثير من معلمي العقود من هذا الهم الواقع على عاتقهم .

الله يعينهم اختي كانت كذا تطلع ٢ ونص ولا يوصلون إلا سبع ص والخروج توصل بعد العصر شلون بينصفنا وزير التعليم وهو يداوم في مدينته ويطالب بالبصمه

الموضوع فيه استجداء تحمد الله وتشكرة لكن الوضع طبيعي تسكن بجوار المدرسة غيرها 15 تنتظر وظيفة ماحصلت

كان الله في عونهن ، جربت هذا النمط 11سنة ، كانت تاخذ من وقتي وصحتي ، اتذكر نصلي الفجر بالطريق ونوصل لمنازلنا والمساجد طالعة من صلاة العصر ، تعب وارهاق شديد ، وتكلفة مالية باهضة . بالنهاية استقريت في تلك القرية الصغيرة ببيت خرابة وايجار مرتفع والصبح اطلع عقرب من حذائي تكرمون 😁

ياكبدي هذي أنا كنت أمشور من الكويت للخفجي عشان الدوام آخرتها خذيت الجنسيه وتركت دوامي بالسعوديه بسبب البهذله وتوظفت بالكويت وبالنهايه أنخدعنا بهالجنسيه 💔🥹

يارب تستر عليها وتغنيها بوظيفة جمب بيتها

طيب اسكني قريب لمدرستك لين تنقلين او اسكني ٥أيام وجمعة وسبت روحي لبيتك

يا عزتي له من ٢ آخر الليل تمشي وتلاقيها صاحيه من قبل تتجهز والله مصيبه وين وزير التعليم ما يسهل نقل المعلمين عند اهاليهم خصوصا المتزوجين منهم

عشت هالموقف ورغم صعوبته كان فيه ايجابيات ،،عموماً فترة وتصير ذكرى

عجيب من يقول اسكني في مكان عملك! إذا عندها أسرة زوج و أطفال او والدين ترعاهم،كيف تنقلهم معها،خصوصاإذا قرية؟ و تتوقعون انهاتقدر تسكن و ماسكنت! عاجبتهاقطع المسافات مثلا! ثم اللي حاسدين المعلمين و المعلمات،كيف تبون الله يرزقكم و هذي نيتكم و ردودكم! نسأل الله العافية و السلامة .

ليتها استغلت هذا الوقت في الدعاء والاستغفار بدلًا من الطنق طنق

سكنة في قريه تبعد فوق 300 الغرف مكشوفه علي الحوش بدون سقف والحوش لما تاقف علي اصابعك تشوف اللي بري كنت ادخل الغرفه واقفل من المغرب للفجر ماطلع خوف

الله يعز الحكومه الي جعلت التعليم متوفر في جميع القرى والمدن وان شاء الله ينظرون في وضع المعلمين والمعلمات شكراً دولتنا العظيمه

ياقو صبر النساء وكفاحهن تبارك الله

الله يعينهم والله اني اقابلهم وانا مسافر يصلون الفجر في المساجد جنب الطريق حتى انا اداوم من بعيد بين دوامي وعيالي 1000كم ادعو لي انقل عند عيالي

اكيد عندها مركز صحي وفيه موظفات وساكنات هناك اكيد عندها بلديه اكيد عندها قسم شرطه اكيد عندها مركز اماره اكيد عندها مركز هلال احمر وساكنات هناك اكيد ابتدائي ومتوسط وثانوي الي يبي يهول الموضوع بيهوله والي بيحمد الله ان الله رزقه بالوظيفه وغيره مئات يتمناها وقد يكونون اجدر منه

تفرقه عنصريه بغيضه ناس تتعين في مناطق جدا في قرى شبه مهجوره وناس تتعين في مدارس امام منازل ذويهم

يوم كنت بالعسكريه كنت احرك من البيت مثل هذا الوقت بس الحصه تبداء الساعه ٦ صباحا

هذا وقت النزول الإلهي وقت يستجاب فيه الدعاء في الثلث الأخير من الليل. ادعي الله سبحانه وتعالى ان يسرلك نقلك وابشري بالخير

ياليت الوزارة تعي ما تعانيه معلمات الهجر والنوائي هذي السنة الثامنة لي بنفس المعاناة نصحى قبل العالم ونهابد للقرى المفروض الي تكمل ٥سنوات تتقل تلقائي والي يقول تسكن انا بنائية وكل سكانها عايشين بصنادق وبعضهم بيوت شعر وين اسكن فيها ولو في كيف اترك عائلتي وابنائي اسبوع @moe_gov_sa

المفترض في قطار بين القرى والمدن لسهولة التنقل ويكون الوضع امن

انا معلم في منطقة نائية و نظام العمل عندنا يصرف بدل منطقة نائية بس هالبدل سحبوه من المعلم فقط!! اقوم ٤ و اصلي الفجر بالطريق و اكمل دربي ليش ما تعطونا بدل زي اي موظف اخر لمن يكون في منطقة نائية؟ 😃

وحنا بالكويت نجيب واسطات لان دوامتنا تبعد عن البيت نص ساعه مع الزحمه ساعه الا ربع بالكثير 🥲😂 ..

وش حاداها تجلس بيت زوجها وتربي عيالها.. إذا قلنا كذا تزعلون خلاص لا تببكك وتوثق طلوعها ورجوعها

كانت تتمنى الوظيفة ويوم توفقت بها قبلت بها رغم المسافة الان تقول انها تعاني !!! الحلول سهلة , تسكن عند المدرسة

ويجي يدور وراها بصمة الساعة 1:30 الظهر

الله يسقي ايام عفيف