موضوع تأخر الرواتب للشركات والموظفين

طبعا بعض الشركات تاخر رواتب موظفينها 5 الى 10 ايام كل شهر و لو تجمعها على بعضها بتطلع 30 يوم نهاية السنة، بكذا الشركة دفعت 11 راتب فقط لموظفينها والوزارة النايمه بتعطي الشركة غرامة بسيطة مقابل فايدة هالشركة من تاخير الرواتب

اتفق معك بخصوص الكلام عن الإدارات لكن بخصوص الموظف وان لإنه مو كويس وإلا كان حصل وظيفة هذا كلام مزعج بصراحة ودايم نسمعه من مدراء ال HR يعني إذا ما عطوك زيادة رح شركة ثانية وإذا الإدارة مافيها انصاف رح شركة ثانية والحين اذا أخرو راتبك رح شركة ثانية ولو ما حصلت فأنت سيء وما تستاهل اللي يعطيك فرصة ثانية .. خلونا نكون واقعيين غالبية الموظفين ناس عاديين لا هو مخترع ولا هو صاحب مواهب خارقه وكلها أرزاق تمشي مع البعض وتوقف مع البعض وهم بنفس الكفاءة أو نقول متقاربين

اهلا اخي هاني .. لم اقل ان الموظف سيء لانه لم يحصل على بديل، بل قلت هي لسببين اما لرغبتك بالاستمرار في المكان او في عدم حصولك على بديل وهذي لها اسباب كثيرة مثل الكفاءة او المكان وغيرها فهي جزء من جزء من جزء اما عن رأيي في ترك العمل في حال تأخر الرواتب، هذا رأيي وذكرت انك اذا تخالفني او فضلت البقاء من اجل اي اعتبارات أخرى ( جزاك الله خيرا وتشكر ولكن حط ببالك ان هذا قرارك وتحمّل تبعاته مستقبلا )

الله يعطيك العافية وان شاء الله صوتك يوصل ويكون مساعد للموظفين والحصول على حقوقهم

مصداقاً لما تفضلت به أ. خالد سبق أني عملت مديراً مالياً في شركة عمرها 42 عاماً في السوق، وكانت مشكلة تأخر صرف الرواتب من أبرز التحديات ،قدمت لمجلس الإدارة ثلاث حلول عملية وقابلة للتنفيذ، إلا أنها قوبلت جميعها بالرفض أدركت أن المشكلة لم تكن في غياب الحلول!!! "قدمت استقالتي "

لا فيه مبرر لان الوزارة نايمه انا بقطاع خاص البارح استلمت راتب شهر 5 متخيل شهر 5 مايو وش تسوي الشركة عندنا تاخذ 3 موظفين من كل فرع تعطيهم 60٪ من الراتب بتاريخ 27 عشان حماية الاجور المضحك ان هالثلاثه استلموا 60٪ من راتب شهر 6 قبل المتبقي لهم 40٪ من راتب شهر 5 اللي نزل البارح

للأسف اعرف احد الشركات يعمل فيها احد الأصدقاء لهم أكثر من3 اشهر ماستلموا الراتب وبعض الموظفين جتهم ايقاف خدمات من البنوك لعدم سداد اقساط3أشهر المصيبة مهي هنا المصيبة الشركة مساهمة وبحكم اطلاعي على القوائم المالية الشركة قاعدة تسجل ارباح وتوقع عقود مليونية كان الله في عون الموظفين

المشكلة يا استاذ خالد إذا الجهة تصرف بناء على اللي تصرفه الجهة الحكومية اللي تكون شغال فيه بمشروع تشغيلي زي شركتي الحالية لها 3 اشهر بدون رواتب وبدينا بالرابع والحجة ان الجهة ما صرفت والجهات اللي تصرف ماشيه رواتبهم بشكل طبيعي ومافي مشاكل هنا وش الحل مع الجهتين

كل عقد مسؤول عنه سعودي شف السعودي ليش سامح بتأخير الرواتب ونايم عن تنفيذ عقده بحذافيره القوانين معك وانت في باطك طبقها صح وما احد يتأخر خصوصاً إذا أجبرت المنشأة تسجل الموظفين في مدد يستحيل تأخير الرواتب لانه يضّر المنشأة

انا بعد ف الموارد البشرية اقسم بالله كلامك صح وهذا اللي حاصل يدفع الموردين 😂😂 لكن ليه مايصير للاصحاب العمل خصم اجباري بيوم الراتب مثل التنفيذ وصاحب العمل يسدد غصب عنه

اللي ما يشتكي حمار مكده و احسن و يستاهل و ان شاءالله ما يعطونه ريال يوم يطلب منك رئيسك في العمل ما يبيك تتاخر ثانيه وحده حقك اذا تاخر راتبك تشتكي وش كبيرها يفصلك احسن من انك تشتغل ببلاش

السوال هل الازمه الماليه تأثر على رواتبهم كمدراء ولا بس على الموظفين المساكين؟صدق يبون الموظف ينتظر ولا يشتكي ولا يعلمون الموظف وش سبب التأخر ويقدرونه بهالشي ، ولا يقدرونه بوقت الرخاء برواتب سنعه او بونصات 🤔

المفترض أن وزارة الموارد البشرية تسن قانون إجبار الشركات والمؤسسات أياً كان حجم تعاملها التجاري ونشاطها بأن تلتزم بميزانية خاصة للموارد البشرية بدء من الرواتب الشهرية وصولاً إلى حفظ حقوق نهاية الخدمة أياً كانت وهذا نظام كثير من الشركات المحترمة تتبعه لضبط الحوكمة وحفظ الحقوق.

هذا الكلام يشمل موظفين الخصخصه قريبآ. من مدرسين و موظفين صحه .

نفس الموضوع صار معايا وكان السبب ( انه البنك فيه مشكلة ولم يتم الحل ) 🥲🙃💔💔

اشتغلت مع شركة كذا و تركتهم و ما كان عندي بديل لان أصلاً كنت حديثة تخرج و ما عندي خبرة بس الوضع لا يطاق صراحه كان عندي ايجار و مسؤوليات و اللي لاحظته أن فيه موظفين ساكتين و قاعدين عشان لهم سنوات يشتغلون معاهم

نصيحة للشباب لا تضيع عمرك في الخاص التجاره ثم التجاره ثم التجارة

اعرف شركة تاخرت ١٠ ايام عن صرف الرواتب وغالبا الاشهر تأخير ويقولون اللي موب عاجبه يترك الشركة

ياحليلكم تتكلمون عن التاخير ، طيب والي راتبه ينخصم ويقولولك مافيه سبب

لي ست سنوات وراتبي مدري اي يوم ينزل وانتظر وكل م كلمناهم فالموضوع اخرو الرواتب زياده

والله اني رافع دعوى لطبيب المستشفى ما اعطوه راتب سنة وشهرين ولكن بعض العمال ظروفهم تحدهم انه يجلس.

طيب كيف اشتكي من ابريل مانزل لي راتب وادخل ناجز يقول لاتوجد لديك دفعات مستحقة حياتي توقفت نزل علي امر تنفيذ بسبب القرض سيارتي راح تنسحب نهاية الشهر اذا ماسددت من يتحمل الضرر هذا ارجوكم

طيب بما انها ازمه وصايره بكثثره هالفتره وين موقف مكتب العمل ومدد من هالشي !

والله العظيم انه شيء يغبن

أستاذ خالد عندي استفسار لو تكرمت

الله يسعدك خالد ممكن تشوف الخاص

المزاج المصري👇🏽 يلوم الشركة على تأخر الراتب دون أن يضع نفسه في مركب واحد مع صاحب العمل، صاحب العمل هو أكثر شخص يتعرض للضغوط النفسية والمالية،والأسهل له فصل الموظفين. إبقاؤه على الموظفين هو طيب منه وأمل بالله بتحسن الأوضاع، الموردين أهم من الموظفين لأن توقف العمل يعني إغلاق الشركة

باقي ما استلمت راتبي للأن

والله اهربو لا تصبرو ، لي سنة واكثر انتظر رواتب ٦ اشهر معلقة بالتنفيذ🥹

والله جبتها طرق عنهم خلال شهرين الله يعز الحكومه الموارد بشرية محكمه عماليه حكم تنفيذ فوري كسرت خشم مدير صاحب شركة تراب

طيب شرايك اللي ينتظروا الدعم ؟

تأخير الرواتب مو بس مخالفة للنظام هذا شلل لحياة الموظف والتزاماته الفواتير والإيجار وأقساط البنوك ما تعرف نظام اصبروا علينا شوي الاستقرار المالي هو أساس الإنتاجية وإذا ضاع ضاع كل شيء

تأخير الرواتب مو مجرد تأخير أجر،هو تأخير التزامات وحياة كاملة يعني الموظف عنده إيجار، أقساط، فواتير وعائله تنتظر راتبه،إذا المنشأة ما تقدر تلتزم برواتب موظفيها،فالأولى تعيد النظر في استمرارها قبل ما تحمل الموظفين تبعات سوء إدارة او قرار،حفظ حقوق الموظف مسؤولية قبل أن تكون نظامًا.

استاذ خالد ارسلت لك على الخاص ياليت ترد علي بخصوص تحديث عقد في قوى وتغير في البنود