هل هذه سلوم تقديم الحليب من المخطي

الله المستعان نحلب للضيف وللطرقي والجار ولا شفنا رجال كاشت جنبنا رحنه وعزمناه وان ما استعزم حلبنا وديناه له و الصيبان خذو الطبع مننا مايردون احد يحلبون للكل والله ان نشتري جراكن للي يبي ياخذ معه ٩٠ جركن ابو لتر عندنا بالكويت ب٧.٥٠٠ يعني ١٠٠ريال او اقل والله مبارك فيها والله الحمد ثبت في عدم رد اللبن قول رسول الله صلى الله عليه وسلم:  ثلاث لا ترد: الوسائد والدهن واللبن. وراه الترمذي وحسنه الألباني

هذا حلالك وانت حر فيه بس كلامك غير لائق جدا ربعك احترمهم  الطيب مايصعب على راعي الطيب وإلا الردي ماهو على الطيب طايل كلن يقول انه على المرجلة : ذيب القول ( قول ) و الفعايل فعايل

الحمدلله من جانا في مزارعنا عبينا جراكله حقة الماء ومن جاء نياقنا حلبنا له ومن جاء مجالسنا قهويناه وقمن بواجبه حسب المقدور … الضيف ضيف الرحمن نكرمه ونصبر على زلاته وعيلاته اللي نقدر نمشيها ولا نتمهزا به ونسخر منه ي حيف على الرجال بس

اول شي كلمة (بووه حليب) وطريقة تقليده ان كان يقصد اهل القصيم عز الله ماصدق هم أهل الكرم والطيب وبيوتهم وحلالهم مفتوح لكل من جاء بلا شرط ولاقيد الا ماحرم الله بالطيب الوالد كان عنده الإبل والله مارد احد عنهن عزيز او ذليل غني او فقير كل من جاء يروح مبسوط بحاجته بلا سلوم تقيد الخير وتكرهنا بالمعروف اما هذا زعول على قطرة حليب

يقول الشاعر عايض المسردي وليا حلبنا درها ماذخرناه نخشر قصير البيت لو كان غايب لم يوفق الرجل في المقطع والمصور هداه الله اخطأ يازين الكرم والبشاشه والجناب الدمث كل ٍ في نعمه والحمدلله وماخبرنا احد امتنع ولامنع من حلب الخلفات لمن طلب الحليب وسلامتكم 💐

عزالله ما عمرنا ردينا الضيف والطرقي عن حليبها بأي وقت وحزه ، نكرمه وإذا ما شالته الأرض نشيله فوق روسنا ربنا وربه الله

حليب البل مثله مثل الكرامة والناس فيه منازل مثل الناس في الكرم والله اني سمعت شيبان يقولون للراعي لا جاك الطرقي في المفلى يبي حليب فلا ترده والبل عذرها معها ان عطفت ودرت فالحمدلله وان عيت على عمرها فعذرها يشوفونه بعيونهم وبعض المسايير يوذون والصبر سمة الطيبين اللي يبون الاجر

ماوقفت على الابل وبس : حتى الغرسه والنخله اذا اراد صاحبها البركه قال صاحبها اللهما ارزقنا منها وارزق الطير وشابر الخير .

كلامه فيه صح وفيه خطا : الصح:انه غلط تروح بماعونك لأبل رجال في مراحها و اهل الغبار اللي كل عصر يجون ويصورون عز الله انه صدق فيها يرقد للعصر ويجيك يعرك عيونه يدور حليب وراعيها بلشان بنياق مرضى وحيران نفر وحالته حاله وفي كربه وتعب ودك تخلص وترتاح ماتدري الا ذاك اللي توه قايم من تحت المكيف بثويبه النظيف ونظاراته يبغى له حليب وتترك شغلك وتروح تسوي له قهوة وتقابله لاشغل ولامشغله غير هروجه اللي تدبل الكبد والخبل مايدري يحسب ان كل ناقة فيها حليب،ماكل ناقه فيها حليب بعضهن ماتشبع ولدها وبعضهن عجور قشرا وبعضهن مدقوقة،وكلامه الثاني عن اللي يقولون فيها حليب والا حميل ذولاك الربع معروفين بالوقاحه والجرأة حتى وقت الصيد كانوا يرمون عند بيوت خلق الله،والخطا يوم ان يقول الحليب للمسكين والشجاع لاوالله كل ضيف له حق فيها وكل جار وكل طرقي لكن بطريقة مستنعه

هذا نبي نعرف وين مكانه علشان مانطلع لمه ولا نقرب حوله 😂