وش رأيك باللي يقوم من الضيفة قبل الضيف؟🤔…

من عاداتنا وتقاليدنا عيب وشق جيب يقول اي أحد يقول أنعم الله عليكم!! إذا الذبيحه ماهي له هذا أولاً ويكون رد المعزب عليه: خلْف من شبع (اللي قام شبعان)وكملو عشاكم ياضيفنا أنت والربع ثانياً إذا قام أحد الأشخاص ولا تكلم!! فهذا يدل إنه عنده عذر لقيامه ولا يقوم الا ناقص العقل أو عنده مشكله وشي فوق طاقته لأن الضيف هو اللي يخلف أو ينعم أو يشكرهم حسب لهجة قل قبيله أو موقع حينما ينتهي العشاء الضيف هو اللي يتكلم عساس تكون الذبيحه ثابته إنه مذبوحه له وكرامةٍ له لان البعض يقدر يمشي ذبيحه على ضيف وهي ماهي له لذلك لزم الام ان الضيف هو اول من يقوم واول من يتكلم والعادات ماتختفي عند اهلها وتبقى اب عن جد وعادات واسلوم ماتنتهي عند المطاليق والكفو شرواك وشروا من يقرأ👍🏻

شفت القوم ذولا صراح ولاعلي من احد لو اللي قام مسؤول ولا صاحب شأن والله الذي لا إله الاهو ماينتقدونه بيدورون له ١٠٠عذر . بعض الأمور خلها من سعه يمكن اكله قليل او جاه مغص😂 الأمور هذي انتهت والزمن تغير ولاتاخذ العلم الا من حكيم 🙏🏻

اللي قالو عادي ونعمة ويمكن بظرفة والله رجال وثقتهم في نفسهم قوية .. اما اللي يهايطون وعيب ومايصير وقل صحه .. ف والله قل الصحة فاللي مايعرف يسولف ولاعنده ثقه بالنفس

عادات ما انزل الله بها من سلطان يارجال لياشبعت قوم واللي ماشبع يقعد ياكل سعة البطون ليست واحده وبقائك على الصحن دون ان تأكل يجعل من فراغك متلصص على الاخرين فتسبب لهم حرج

وش دخلن بوه شبعت من الأكل أقوم فوراً وإذا هو جوعان وتأخر تأخر معه سلامات😂🦋

سلوم وعادات. وكلا حسب فهمه للموقف. والوضع عادي. من اول اذا خلصوا اكل. اول مايقوم الضيف بعد مايتاكد ان الجميع. كف يده من الصحن الحين من شبع قام وقبل الضيوف. وقال كرمكم الله او اي عبارة اخرى. ومع البوفيهات المفتوحة. قلت السلوم والعادات

هذه العادة تجبر الضيف يقوم اول واحد عن العشاء و بسرعة حتى لا يثقل على غيره من الضيوف. و يفتح المجال لغيره ان يجلس على العشاء… عادات بدأت تنتهي.

مثل هالتصرفات ما يحتاج تهول وليش يقوم الشخص قبل الضيف هي ترجع على احترام الاشخاص للضيف وقدره عندهم ومن باب الكرم اذا خلص الضيف وقام وكرم بعدها المعازيم يقومون ما تحتاج اوصاف غير لائقه على الشخص الي قام بدون ما يعرف هالسلوم او ذم المضيف لان الاهم بالموضوع اكرام الضيف

المفروض المعزب يقول له ( والله ما تقوم قبل الضيف ، اجلس وتم يا رجل ، كل من النعمة ) .. حتى لو قام بعدها ما يهم لانه اخذ حق الضيف خلاص .

من شفتهم يقاطعون بعض في الهرج عرف انهم طقوعين واما العرف ذا مختلفين فيه العرب لشمال عرفهم ولنجد عرف والشرقية شيء، وللجنوب والغرب عرف والدنيا تمشي بالسماحة أحيانًا يجي ضيف متحضر اقوى شيء بيقوم ويخليك تنجلط 😂 وبيعيدونها كثير عليك ف لا تشدها