أماني جحا

عبالي احكي عن علاقتي ب "علية" او ام وائل، قلبي المعلّق بالارض، أنا، واعوذ بالله من كلمة انا، أقلّ وحدة بالبيت بتتواصل مع العيلة. يعني أقلّ وحدة بتتصل، ويمكن كمان الأقلّ تعبيرًا. بس دايمًا بحسّ إنّي كنت أكتر وحدة بتشبه أم وائل. بشبهها بكيف بستقبل أيّامي، وكيف بواجه الطحن اللي بتطحننا ياه الحياة. كيف بتبتسم، وبتحكي، وبتقرّب الناس منها، وكيف بتحضن وبتحب، وكيف بتخاف تأذي حدا. للحق، يمكن كنت أقوى منها، بس مش لأنّي خلقت قويّة. لا… لأنّها كانت دايمًا حدّي. بضهري تمامًا. عيونها وإيديها كانوا رفقاتي، حتى لما ما كنّا نحكي. بتصرّف متلها، بس بخاطر أكتر منها، وبتحدّى أكتر منها. بس هيدا لانو هيّي اللي هيّأتلي الأرض، ووازنتني نفسيًا، ودفشتني لقدّام، وقالتلي: “انطلقي.” بحس انو بتحكيني غير كلّ إخواتي، ويمكن بتحكي كلّ واحد فينا بطريقة غير. وقد ما فيها تكون خصصت ولا مرة حدا فينا حس انها ميًزت. منضل حوالَيها متل الصيصان، وكلّ واحد فينا حاسس إنّه هو مطرحه قلبه. علية بتقلي: “إنتِ تعبتي يا ماما… الله يهدي بالك.” بتدعي بقلبها، وبروحها، وبعيونها، وبإيديها. وأنا… وحياة إيديكي وعيونِك، بعرف إنّ لطف الله بحياتي كان إنتِ. وبعرف إنّ كلّ اللي جايي، رح يكون أحلى

16,815 views