AJ

بي ٦ دقايق، عملت صولا للسويدا شي ما قدر يعمله سياسي ولا حكومة بأكثر من سنة. نحنا اللي من بعد المجازر حسّينا حالنا غرباء ببلدنا، ومشينا بعيد بقلبنا قبل خطوتنا… رجعتنا الليلة شوي لمكان بعيد كثير و قريب كثير. جبرت بالخاطر من دون ما تطلب منّا ننسى، و من دون ما تتجاهل وجعنا، بالعكس… غنت لسوريا الواحدة وهي شايلة السويداء بقلبها، وخلت هالفكرتين يعيشوا مع بعض بدون ما تلغي وحدة منهن. وها تحديداً اللي كسرني الليلة 🥹 عم بكتب بالعربي قصداً حتى يوصل كلامي لأهلي بالسويداء الموجودين هون على X: أني حسيت اللي حسيتوه… وأني كمان بكيت. أول ما سمعت الجوفية قلت بيني وبين حالي: يا حبيبييي، أكيد أهل السويداء بالجمهور قرروا يقلبو المطارح...وفي سوابق النا بقلب المطارح 😅. بس لما استوعبت إنّها جزء من افتتاحية الغناية نفسها، وإنها هي اللي اختارت تدخل قلب و روح السويداء معها عالمسرح، صار الموضوع أكبر من أغنية. كان احساس رهيب. بعد كل الصمت اللي حسّينا فيه من حوالينا، إجت صولا و حاكتنا و طيبت خاطرنا و حمدتنا و غنتلنا مع الجوفية و بكتنا … يا الله شو أصيلة. و شو منحبك. دغري سجلت و بعثت الفيديو لأمي، وهي أساساً مش من محبّين أصالة، لسوء حظها. أول شي قالتلي: "مستحيل هي الحفلة بسوريا… كيف غنّت للسويداء وحكت عنا هيك مستحيل يخلوها!" ضحكت وقلتلها: اصالة من زمان بتحب الحكي وهي ما بتعرف تجامل و صاحبة كلمة و موقف و ما بتخاف من حدا واللي على راس لسانا بيطلع بعفوية و من دون فلتر.. صولا ما طلبت منّا نرفع راية فوق جرحنا، ولا قالتلنا انسوا دمكن… بس مدّت إيدها إلنا. زتتلنا مش قشة بس كومة محبة ورجعتلنا شوية روح وبنفس الوقت فتحتلنا جروحنا… قالت كلمة طيبة بمكان صار فيه الكلام الطيب نادر. جبرت بخاطر ناس مجروحين، ومن كثر ما نحنا مجروحين، حتى الحب صار يوجعنا❤️‍🩹 اني لليوم ما بعرف كيف ممكن نسامح، وكيف منرجع، وكيف منطلع بالعلم اللي صار مرتبط بذاكرتنا بوجوه قرايب وأحباب فقدناهن بابشع صورة. بس الليلة، ولو ل ٦ دقايق، أصالة خلتني أتذكر إنو يمكن الوطن مش بس علم وحكومة وسياسة… يمكن الوطن كمان صوت، حضن، وواحد بيقلك: اني شايف وجعك وبعدني بعتبرك مني. تعلموا من أصالة! الإنسان ما بيرجع الناس لبعض بالقوة ولا بالشعارات، بيرجعهن بكلمة صادقة، وبقلب عنده رحمة، وبشجاعة إنه يشوف وجع غيره ويحضنه حتى لو مشي عكس التيار. اللي انكسر بيناتنا أكبر من أغنية يكثير، وأعمق من إنو يصلّحه كلام او فنان… بس الليلة أثبتت أصالة إنو المحبة بتقدر تفتح باب حتى بالحيطان اللي بناها الوجع. ٦ دقايق بس… ولقينا حالنا، رغم كل شي صار، بعالم ثاني…. #صولا #اصالة_في_سوريا #اصالة #اصالة_نصري #سوريا #السويداء #Assala Assala #sweida #suwayda