ترند " مقطع متداول " رجل ينتقد: أول كان عندنا عادة طيبة وزينه وفيها أجر اللي هي عانية الزواج أو الرفده أو القطه لكن العانية اصبحت الآن تؤرق كاهل رب الأسرة واصحاب الدخل المنخفض وقطعتنا من بعض الناس لا نروح نحضر زواجاتهم، خلاص وقفوا العانية أصبحت عذاب!

العانيه مهو شرط عند الطيب اللي بيجي بدون عانيه وانا اعرفه والله انه من اعز الحظور هي معاريف بين الرجال مهي فرض واجب.

عندنا على مستوى القبيلة مبادرة ( النفعة في الزواجات ) وقد والله سهلت الموضوع بشكل كبير جداً: 1️⃣/ صندوق الزواج نحدد كل ستة أشهر كم عدد المتزوجين ( فترتين في السنة). 2️⃣/ كل ذكر من القبيلة من عمر يوم الى عمر السبعين سنة يدفعون في الصندوق. 3️⃣/ تحدد العانية بمبلغ مقطوع لكل متزوج ( ١٥٠٠٠) خمسة عشر الف ريال . 4️⃣/ يضرب عدد المتزوجين كل ستة اشهر في النفعة لكل متزوج والناتج يقسم على المشاركين جميعا في الصندوق. 5️⃣/ أحيانا لا يدفع الشخص عنه وعن اولاده في عشرة زواجات اكثر من ٥٠٠ ريال. 6️⃣/ وافضل مافي الموضوع ان هناك وقت طويل للجمع تمتد لثلاثة اشهر او اربعه ويمكن تقسيطها على الراتب. 7️⃣/ اذا كان هناك قرابة او احد تستحي منه فهذا شيء يخصك بينك وبينه . حققنا فوائد عظية جدا منها: - الناس سواسية كلهم في مقدار النفعة، فلا مجاملات للأغنياء ولا احتقار للفقراء. - صار هناك تخفيف جدا جدا على الناس من ناحية الدفع المتكرر في كل زواج بمبالغ كبيرة. - حصل هناك اختصار جدا في الزواجات حيث كان الناس يتعنون من اجل الدفع وتسجيل الاسماء والحضور لكن الان زواجات مختصرة ويمثل القبيلة خمسة افراد معروفين لتوصيل عانية ونفعة الجماعة للمتزوج. طبقوها فهي والله نافعة ومفيدة ومريحة جداً.

الموضوع بسيط اللي له قرضه عندك يعني معاونك انت ترد له العانيه والي ماله قرضه عندك تقدر ماتحضر بكيفك لكن هي مبنيه من أول كنها سلفه اللي تعطيني ارجعه لك على زواجك او زواج عيالك وقضينااااا

فكر قبل أن تأمر القلم بالكتابة المحتوى الذي تنشره قد يكون جسراً للعبور أو فخاً للمتاعب. تذكر دائماً أن جمهورك ليس صنفاً واحداً : 1. هناك من ينقد ليصحح. 2. ومن يتشره ليعتب. 3. ومن يؤيد ليتبع. اجعل التأني قبل الإرسال هو قاعدتك الذهبية.

ياسلام ليش ماقلت هالكلام يوم زواجك بعد ما اخذتها انت واخوانك ومن في عمرك تبي تقطعها على هالجيل الضعيف اللي لا وظايف ولارواتب زي الناس ياليتك ساكت بس .

فقد ورد في حديث الإعانة على الزواج أن أجر من أعان شاب على الزواج نال أجر ذلك إلى قيام الساعة ويعتبر هذا الفعل من أعظم القربات حيث يسهم في تحقيق فضل تزويج الشباب وتخفيف أعباء الزواج عنهم مما يحقق استقرارًا اجتماعيًا كبيرًا

العانية من اسمها هي من باب الاعانة على الشيء في السابق كان بما تجود به نفسك ذبيحه او اي شيء تساعد فيه اليوم أصبحت مبلغ مالي وماهو محدد وماهي لازم اساسا تندفع على حسب مقدرتك امر الله من سعه

المشكله عندك 3 عروس بالشهر إذا تبي تعطي عانيه لكل واحد 1500 وش يبقي من الراتب هذا غير نقوط الحريم تكون كذا فلّست والحياه ما ترحم

ليته مايترزز وكلامه مردود عليه عانية الزواج كلاً وقدرته وللأسف اصبحنا بزمن الرويبضة لو صادق كان تكلم عن عشرات الملايين التي تجمع لقاتل مجرم وهاتك شيلات وعزايم ورقص واثقال لكاهل افراد القبيله

مشكلة برامج التواصل الإجتماعي آلبعض يبي يسولف ويبي محتوى ع الفاضي موضوع عادي موضوع غير الزامي !!!!!

ما يحتاج اجتناع في الدعوى خلوكم مثل اهل الكويت اكتب نعتذر عن قبول العانيه وحضوركم شرف لنا

بعد ما تزوجت و اكلت عانيات الجماعه جاي تتفلسف روح رجع عانية كل رجال عطاك عانيه ولاعاد تروح زواجاتهم ولاتعزمهم على زواجات عيالك او احلف ماتاخذ عانيه من رجال اذا زوجت عيالك والوجه من الوجه ابيض عندنا كثير يعطون عانيات للعرسان لكن اذا الزواج لعيالهم يدعون دعوة عامه للجماعه ويرفضون ياخذون عانيه من المعازيم ويحلفون محد يمد ريال

اصلا الاشكال ذي ماحد يشره عليه من وجهه

@grok هل هاذا النقد في منه فايدة

الزواج المختصر مافيه زيه لاكن الناس يحبون المظاهر

بعد ما تزوج وأخذ الرفدة قال اقطعوها، تراها سلف ودين مو هبة!

اي واحد عمل له حفل زواج لايجب ان تتم أعانته لأن عنده فلوس اللي يسوي زواج مختصر اب وام العروس والعريس واخوانه واخوانها هذا اللي لازم يتم أعانته لأن ليس هدفه الهياط والفشخرة نحن شعب أكلتنا النعمة وخاصة لدى النساء لازم عرس ويعيش الزوج في فقر دائم بسبب حفلة زواج

الزواج المختصر هو الأنسب لزواج بلا تكلفة مالية باهظة على العريس والمعازيم .

في زواجهم عطيت واحد 1000 والثاني 1500 ولا عطوني ريال في زواجي للأسف

اللي مقدم على زواج نصيحه مني خبر الجميع لا أحد يجيب عانيه وريح عمرك لا باخذ ولا بعطي .. بتفرح بها اسبوع وتخلص وبتجلس تردها عمرك كله . احيان العانيات ٢٠ الف او ٣٠ الف وانت تجلس كل صيفيه تردها لأهلها الين يوصل عمرك ١٠٠ عام من البدايه اقفل بابها

يازين زواجات حضر نجد وبس لاعانيه ولاعطني واعطيك ( مهر حسب المتعارف عليه وشبكه فقط) وعلى حسب قدرة العريس وحفلة الزواج بالتعاون بين اهل العروسين اهل العريس عليهم زواج الرجال،واهل العروس عليهم زواج النساء على حسب رغبة أهل العروس (زواج صغير او وسط عائلي او كبير )والله يوفق الجميع

اذا العانيه اكثر من 1000 ارفضوها لانو ما بتحصلها بعدين تردها وقت يسير عند اللي اعانك حفل او مناسبه

لم تكن و لن تكن إلزامية .. بغيت بغيت سلم و تعش و رح لأهلك .. اما تنصب نفسك وكيلاً على أمة محمد فلا يجوز لك ..

تحولت بعض العزايم من مناسبة للفرح والمشاركة إلى وسيلة صريحة لطلب العانية والمؤلم احيانا ان الدعوة التي تصلك لا تستهدف تشريفك بالحضور بقدر ما تستهدف جيبك كجزء من فاتورة تكاليف الزواج. #العانية #عادات_اجتماعية

مرهقة جداً خاصة إذا وقت ليس جيد.

اذا اخذت من الناس ورجعت الي اخذته بعدها اقطعها 🤗🤗

العالم معاد يقبلون ياخذون عانيات انت وين عايش جي توك تكلم

@QNNNA انا بنسبة لي لو تزوجت : زواج مختصر وانتهى الموضوع والفلوس انا اولى فيها صحيح لازم اظهار معالم الفرح ولكن ماهو زواج واعزم خلق الله وجمع خلق الله انا اولى بالفلوس في تكوين نفسي

ياخوي اللي تقدر عليه ما يحتاج مبلغ ضخمه

العانية فيها خير باللي تقدر عليه واحتسبها عند الله