شاب يتحدث عن موقف حصل له وهو ضيف عند أحدهم : كنت معزوم عند رجال والضيافة لي وبعد ما جلسنا على العشاء بدقايق كلهم وقفوا ياكلون ويناظروني وواحد منهم قالي "كرّم يا مضيف" قلت له اللي شبع يقوم، معي حق ولا أنا غلطان ؟!

المفروض الي يتعشون مع الضيف محد يكف يده لين يخلص الضيف ويجارون الضيف في العشا ومفروض من الضيف يوم شاف الرجاجيل كفو يدهم يكف يده مع الرجاجيل مب لازم تشبع الغلط منك ومنهم

نجلس لين يشبع آخر واحد حتى لو بزر .. خلي العالم تأكل وتشبع الواحد يتكلف وفي الأخير تقوم الناس وهي ما شبعت

اذا هذي عادات وتقاليد اضرب فيها الجدار هذي عادات بخل وقلة حيى ! حنا ناكل واذا شفنا الضيف كاف يده ! نقوله تعش ماوراك احد تعش ! واذا حنا شبعنا والضيف مابعد شبع !! نمثل اننا ناكل ونمد يدينا ع الصحن ومانبين للضيف اننا شبعنا .. ومن نضيفهم ! يستحون يقومون بدري يجلسون لين الكل يكف يده

اصلا من اكرام الضيف حتى لو شبعت، تجامل الضيف وتاكل علشان ماتحرجه ! قمه السخافه تقوم ضيفك من العشاء

السلم عن الناس اذا كنت انت معزوم على ضيفة لشخص غيرك انك اذا شفت الضيف خفف اكله واكتفى انك تكف يدك عن الاكل لين يكرم ويقوم وتقوم بعده والضيف بعد يشوف حال المعازيم اللي معه اذا انهم كفو يديهم يكرم ويقوم ولا يقعد ياكل والناس كافه يديها

انا عن نفسي اكل واذا شبعت قمت غسلت اما انتظر الضيف يخلص عشان اقوم ذي مسخره

المفروض يكون مثل عنتر 😂😂

والله ماجابنا ورا الا هالعادات والتقاليد اللي مامنها اي فائدة وفيها احراج للضيف والمعازيم.. اللي يبغا ياكل خلوه براحته واللي شبع يقوم عادي.. الحمدلله ع نعمة اهل جدة لا عادات ولاتقاليد تحكمنا والموضوع سهالات.

وللمعلومية المضيف مايدري عن الموضوع هذا.

هذي عادات و تقاليد لازم تُحترم حتى لو ما اعجبت الشخص وشلون يعني نصير مسخ لا عادات ولا تراث و لا سلوم عشان يرضون المعترضين ويحسونا متطورين ؟ عمرهم ما رضوا

عادات ماانزل بها من سلطان تنم عن جهل وتخلف ..!! اكرام الضيف تتركه علي راحته اما تسن له قوانين وانظمه وخزعبلات بإسم المرجله والعادات حتى النساء بإمكانهن القيام بهذا المنهج المتخلف هل يحسب لهن فحوله وشهامه ورجوله ..؟!! "من كان يؤمن بالله واليوم الآخر فليكرم ضيفه" مايراقب ضيفه ..!!

ماعمري سمعتها احد يقوم الضيف من الصحن أكيد اللي قالو هالكلام ماهم عرب

اكثر صاير يستفزني بالولائم والمناسبات الاجتماعية هذه البروتوكلات المتكلفة جداً وكأنك في مائدة ملكية كل شيء محسوب وكل حركة عفوية تتعرض للنقد واللوم ! اذا كنا نحاسب بعضنا على كل كلمة وكل فعل مالفائدة من تجمعنا هذا طالما لا ترفع فيه الكلفة

بربرته واجد شكله كذاب اقص يدي انه قاعد اكثر من 20 دقيقة وما كرم ولا قام

الله من الغباء في ورعان الجيل الجديد، يستنسخون اتيكيت واداب الضيافة من ابائهم بدون اي تأمل او تفكر في حكمتها، الحكمة من انك ما تقوم الين يقوم الضيف عشان ما تحرج ضيفك ويقوم وهو ما شبع، مو تبلشه يقوم بدري عشان حضرتك ما جاز لك الاكل او قصبك يابس

العرف بالمجالس إن الرجال ما تقوم من عند الصحن دام الضيف جالس، واللي يشبع يظل في مكانه ولا يبيّن شبعه لجل ما يحرج غيره، والضيف يطوّل جلسته مراعاةً للربع حتى يشبع الجميع. هذي سلوم الأولين يرفعون مقام الضيف وكلٍ يتصبر لجل راحة غيره .

عادات العرب في هذا الموقف تختلف بعضهم من العيب يطول عشان باقي الضيوف ملزومين فيه وما يقوم الواحد حتى يقوم هو والبعض الآخر من العيب انك تستعجل لأن باقي الضيوف اذا قام قاموا احتراما له حتى لو الواحد ما شبع اما انت لا سويت الاولى و لا الثانية الله يهديك

بعض العادات ودك لو تندثر وش الي اقوم ضيفي عشاني شبعت لو اني شبعت وهو باقي بقعد واكل شوي شوي واسولف معه لين يشبع هذي عادتنا اما اني اقومه من على النعمة عشان شبعت هذي لا العقل ولا المنطق يقبلها ومن العادات الطيبة ان المضيف ما يقعد مع الضيفان من الاساس عشان ياكلون براحتهم

ياكثر هرجك ياخي ماتعرف تختصر

بعض الناس اللي متشدد في العادات الكذابة المفروض ماتعزمه ولاتعطيه وجه .... وجوابك سديد وده يأكل ولا عساه ماأكل ... العينات هذي ماأحد يتشرف فيهم

قبيلة حرب ماتقوم لين الضيف يقوم بالذات صاحب الضيافة من العيب يقوم قبل الضيف لكن لانهمز ولانلمز لو يجلس الضيف لين الفجر نحط نفسنا ناكل مثله وهذا من الكرم اما العادة الي قالها صاحب الفديو اول مرة اسمع بها

صح اللي شبع يقوم يغسل ولا ينتظر باقي الناس

تركتم الزبده وتمسكتم بالقشور خلاص الضيف قال لك اللي شبع يقوم قوموا مهو لازم يكرّم وبعدين ليه تطلبون من الضيف يكرّم ماتستحون انتم . فيه اشياء قديمه مهو لازم تطبقها نصاً يكفي تطبيقها بالمفهوم .

قم ورح خذلك شاورما ولا الذله ذي

الاحترام للضيف اولا، ياكل الين يشبع وحتى لو شبع نعطيه زيادة الين يطفح

من اداب الطعام في الدين وسنوم العرب مايقوم المضيف وان شبع حتى يقوم اخر واحد من الضيوف ولاينحرج احد لكن ذا المهايط وشغل جماعه غليص الله يفكنا منه

هالبشر يحبون التعقيد ب امور حياتهم والدنيا اسهل وابسط من كذا

انا مره ضيف ومعي اثنين من اخوياي الضيوف حنا ثلاث واخوينا زملاء العمل جانا نقل حنا وقالو لكم كرامه قلنا ع القوة تو سمينا الا خوينا الضيف قام كرم ماطول يكمن ٤ دقايق والثاني يطالع فيني وياشر يقول قمنا عند بعض القبايل اتوقع كذا عجلين يتحرجون من الاكل

اصلا غالبا الناس لو شبعت تسوي نفسها تاكل عشان الضيف ياخذ راحته هذه ناس غريبة مستعجلين !!

الغلط من الطرفين من الضيف إلي ما أستحى و فيه شفاحه و من المعزوم إلي ما أستحى و يبغى يقوم الضيف الصراحه اشوف مكانك انت و المعزوم في جلسات مطعم بخاري و كثيره عليكم

الضيف احيانا يشبع وينتظر الين يحس الناس شبعت ثم يشكر.. في التقاليد مااحد له حق يقول للضيف كرم ياضيف

الله يرحم جدي اذا شاف الناس بدت تكف يده عن الأكل صاح ( تراها سعوديه ) والي شبع يقوم لحد الآن ما نعرف منين جاب هالكلمه

لحد يقعد يدافع على عماها ! بس عشان ربعه وجماعته عندهم ذا العاده الله سبحانه عطانا عقل نفكر فيه الواحد مايصير امعه وعنده تقليد اعملى بدون عقل ويترك عنه العادات القبيحه هذي ويصبح كانه ممن تنطبق عليه الايه (وإذا قيل لهم اتبعوا ما أنزل الله قالوا بل نتبع ما ألفينا عليه آباءنا أولو كان آباؤهم لا يعقلون شيئا ولا يهتدون) عند كثير من القبائل العكس الي يخلص مايقوم اكراما للضيف عشان مايستعجل بالاكل وياخذ راحته الين يشبع وفيه من اكرام النعمه وبعضهم ماعنده اي تشدد بهذي الناحيه الي خلص يقوم ضيف ولاغيره وبعضهم اذا قام الضيف لازم يقوم وهذا بعد غلط اما الجماعه الي تكلم عنه بالفيديو هذولي لاخلو ولابقو يقومون ضيفهم غصب! وين كرامة الضيف اذا قام من عندي ماشبع ثم راح يدور له مطعم يسد جوعه! مشكلة هذي النوعيات مايتعلملون مع العشاء انه اكل ونعمه وتاكل لين تشبع لا متعاملين معها انه توجيب بالاسم فقط تحط يدك ثم تقوم ويمكنهم بعد من النوع الي يقول عيب تاكل واجد عند الناس امحق عاده هذا قمة الجهل والتخلف

والله وانا اخوك دام السالفة هذي جلست اكثر من 5 دقايق تقولها شكلك جلست تسولف عليهم والعالم شبعت والعيشة بردت ولا انت اللي تعشيت والعيشة صارت باردة وهنا خلاص زبدو لك ولا الصراحة هم غلطانين 😂

هو صادق والله انه عيب يقول للضيف كرّم .واصلاً عيب تقول للضيف كرّم لو يجلس ما يجلس وانت على كرامته بالذات في زمنّا ذا من خير و سعه الحمدلله. الاولين كان الضيف يقوم من على الصحن بدري عشان القوم اللي بياكلون بعدهم و يستنونهم يقومون ولاّ ذلحين الحمدلله يقوم الضيف ونص المفطح ما قربُوه