علامات تدل على قرب الوفاة..

أنا وقفت الفيديو ما كملته لكن هذا الفيديو يكون سبب بالوسواس والشك والخوف وش تستفيد يوم انك تخوف الناس تدور الترند وإنك جايب موضوع شيق حسبي الله عليك

هذا تصديق لحديث النبي عليه الصلاة والسلام َ العبدَ المؤمنَ إذا كان في انقطاعٍ من الدنيا وإقبالٍ من الآخرة، نزل إليه من السماءِ ملائكةٌ بيضُ الوجوه، كأنَّ وجوهَهم الشمس، معهم كفنٌ من أكفانِ الجنة، وحنوطٌ من حنوطِ الجنة، حتى يجلسوا منه مدَّ البصر

حمد بن مهنا الدوسري ايضاً تنبأ بوفاته ووفاة صاحبه فهد ومات الاثنين بعد القصيدة في شهرٍ واحد!!!

"علامات ومؤشرات تدل على اقتراب الأجل، على الوفاة، وفي قصص كثيرة من وقتنا الحاضر هذا والماضي. من الماضي، على سبيل المثال، نمر بن عدوان؛ الفارس والشيخ المعروف. نمر بآخر حياته كان مريض، ويوم إنه كان جالس بمجلسه، العصر وعصرية، ويطالع هالفضاء قدامه.. قدام مع ميله، يطالع وكان على مركاه. ويطالع أنت يا نمر، إلا أهل ركاب جايين؛ أهل ركايب، أهل إبل يعني، جو جايين. وقام يحيّي: يا هلا بأهل الركايب يا هلا، يحيّيهم. سمعه ولده عقاب، وجاء.. يحسب إن في أحد جاء، ويطالع ما في أحد! وسأل أبوه قال: يا يبه وينهم أهل الركايب؟ كان يقول: يا وليدي هاذهم قدامك. ويطالع الولد إلا ما من أحد؛ فضاء، عصريته فضاء ما فيها أحد. قال: يا وليدي هاذهم قدامك لفوا. قال: يا يبه ما في أحد! عرف نمر إنهم سبحان الله الموت، جايين يقبضون روحه، وهذه قصة موثقة بأبيات، عرف إن هذا الموت اللي جايه. قال: خلاص رح رح يا الولد هات لي الطرس، وهو على مركاه يبي يكتب.. زي إنه يكتب له بدفتر أو كذا، هات لي الطرس والخط، يبي يكتب. جابها الولد، قال: رح عني. الولد يحسب إن أبوه خارب أو إنه.. هو تعبان وكبير. وهو يكتب: يا اهل الركاب امنين لولين لافين ... انتم منايا والمذاهب اخفافي انتم طروش الموت مانتم خفيين ... ياما خذيتوا من ارواحن صخافي لا جوكم الحسيد وقالوا نمر وين ... قولوا نمر... وهو يطيح على مركاه وهو يموت! جاء ولده بكى عند راسه، ويطالع وكان مكمل الشطر الأخير ولده؛ كتب.. مو كاتب (لا جوكم الحسيد وقالوا نمر وين) كمّلها هالولد للتاريخ وكتب: قولوا نمر في لذة النوم غافي كذلك الأمير محمد الأحمد السديري -رحمه الله- تنبأ بموته أو بوفاته، سبحان الله هي علامات ومؤشرات. يوم زاره الأمير سلطان بن عبدالعزيز -رحمهم الله جميعاً، الله يرحمهم جميع- يوم زاره قال أبياته الشهيرة السديري يوم يقول: سلطان شفت الموت مرة ومرة ... والثالثة يا مير كشّر بنابه ما بيه ما بيه لكنه بلاني بشره ... وزودن على خيله يجمّع ركابه لو هو ظهر لي في صحاصيح بره ... نذرن علي إني لأبين صوابه شوف تنبأ السديري بوفاته، وكثير يتنبأون يعني حتى مثل ما قلت بوقت سبحان الله، وتلقى شايب مثلاً يقسم الورث، أو رجل أو امرأة. في قبل كم يوم أنا زرت واحد تقهويت عنده من أصدقاء مقربين زي الأخ، وكان عندهم عزا. يقول: سبحان الله المرة هذه اللي توفت، يقول ما فيها أي شيء، يقول فجأة قامت تتصل على المقربين منها، وتقول الساعة عشر الصباح لازم تجوني. هم يعني انخرعوا ما يدرون وش الوضع، يوم جو يعني غريب وضعها؛ قامت تضمهم وقالت إذا في شيء حللوني، يا بنت الحلال في شيء؟ كانت لا والله بس إنكم طريتوا علي وما أدري، وإذا في شيء وتكفون، تضمضم الحريم وتسوي، والعصر توفت! هذا قبل كم يوم. لذلك سبحان الله في علامات ومؤشرات تأتي للشخص ويحس إن منيته أو اقتراب أجله، لزيادة المعرفة والثقافة بهالأشياء هذه."

قبل وفاتي والدتي الحبيبه رحمها الله كانت تقول (ياكثرهم كثراه ) ثم بكى احد اخواني ، ولم نعرف السبب الا لاحقاً يقول كانت ترى ملائكة الموت . والاخر ولد عمي قبل وفاته بربع ساعه كان يقول لابيه من الرجال اللي دخلوا الغرفه لابسين ثياب بيض . رحمهم الله وجميع موتى المسلمين

الوالد رحمه الله ، قال قبل أسبوع من وفاته أنا ما راح أكمل معكم أسبوع أو عشرة أيام أنا ميت ياعيالي وفعلاً ماكمل الأسبوع إلا وهو في قبره.. رحل وترك لنا الفقد وذكره الحسن وسيرته الطيبة، أسأل الله له الجنة ونعيمها وجميع من سبقونا من الأهل والأحباب

تمّـت وفرجها عزيـز الجـلالي= ( وفرحت بالطـارش لروحي يزيله ) هذا الشاعر العوني في خاتمة قصيدته التوبه ؛ يقول ( وفرحت بالطارش !) يعني بالطارش الموت .. حيث مات بعدها رحمه الله ..

جدي الله يرحمه كان يشوف ناس لابسين ابيض في ابيض يجونه يسولفون معه و بعدين يروحون جهة المقبره و يرجعون له يسولفون و مره دخلنا عليه وقالنا عنهم وقال انه فاقدهم و يسألنا عنهم فينهم فين اصحابي و سبحان الله في نفس اليوم في الليل توفى رحمه الله ومشهود له بخير رأينا له رؤى تبشر بالخير

يا ليته تشهد بدال القصيدة اسأل الله ان يجعل خير اعمالنا خواتيمها وان يميتنا على لا إله إلا الله محمد رسول الله

فيه ناس فيها هلع وتطير والاجل ما يعلم فيه الا ربك ارحمو الناس من هالكلام

رحم الله جدتي قبل وفاتها بيوم كانت تصد عن الجميع وتطالع جهة الجدار ومعطيه ظهرها للي جالسين عندها استغربتا وحسينا انه دنو الأجل وفعلاً رحلت الى الرحمن الرحيم اسال الله ان يغفر لها ويرحمها يارب آنس وحشتها وآمن روعتها وارحمها في غربتها

أمي يامال الجنه والله العظيم فعلا كانت حاسه بقرب المنيه اتصلت علينا وحده وحده وعلى خواتها وقالت بشوفكم ورحنا ولأول مره بحياتها تمسك ايدي وتقول لي آنا راضيه عليج 😔💔 واتصلت على كل كان معاهم خلاف وراضتهم كلهم وقالت حللوني وفعلا لمن شافت كل من تعزهم وكانت اتحنا يوم خميس وتوفت 😢

هالحين اتوقع يجيون الملائكة في مواتر فخمه لكازس ومرسيدس وبي ام واذا كنت من اهل النار بيجونك في دينا او شاص او ددسن 85

التكملة المنطقية لشعر بن عدوان غفر الله له ..قولوا نمر على رحمة الله لافي

اقداركم تأخذ من أفوآهكم قل خير تجد خير ماراح تموت الا ع يومك قال تنپآت هاذ سؤ ظن بالله وهو من قال انا عند حسن ظن عبدي بي ان كان خير بخير وان كان شر فشر

هذا زهايمر موب علامات اقتراب

سؤال هذول بدل ما يشهدون و يرددون الشهادة يقولون و يألفون شعر قبل الوفاة؟ او أنا ما فهمت

يتكلم عن الموت والخلفية موسيقية!!

لوهو ملقن الشهادة بدال القصيد افضل

نسأل الله حسن الخاتمة والعمل والثبات على التوحيد وأن يكون آخر كلامنا من الدنيا شهادة أن لا إله إلا الله وأن محمدا رسول الله وأن يدخلنا في رحمته ومغفرته ويعفو عنا سيئاتنا ولا يؤاخذنا بما اسرفنا وأخطأنا ونسينا وقصرنا وأن يسكننا جنة الفردوس الأعلى من الجنة وأمواتنا وأموات المسلمين أجمعين

اخوي الله يرحمه قبل في الجيش وكان رايح دورة العسكريه وقال زينو لي حليب ترى اخر حليب بشربه عندكم ٤٥ يوم بالضبط وصار عليه حادث الله يرحمه

وبعض الناس تجيهم احلام ويدرون في حاله وفاة بس مايدرون من ؟

الناس هذي من وين جابوا قوة القلب . الموت جاه ويقول اعطوني الطرس بكتب قصيدة . لو واحد غيرة كان القبيلة كلها تركض وراة ماهي قادرة تمسكة من الخلعة والخوف . الله يرحمنا ويهون علينا سكرات الموت

صدفه التقيت بزميل عمل ومع السواليف قالي انا احس بان يومي قريب استغربت منه قلت هذي افكار حتى تقوي ايمانك انت راعي طاعه وقوي ايمانك بالله وبعد فتره قصيره صار عليه حادث هو واولاده وتوفوا الله يرحمهم

وقت الموت يكشف الغطاء عن الانسان فيصير يشوف الاشياء اللي مايشوفها الاحياء وهذا مذكور في القرآن الكريم ( فكشفنا عنك غطائك فبصرك اليوم حديد )

بالله عليك لا تسولف

مافي ولا شي لا تكذب ولا تشرك مع الله. له الحكم وله الأمر. انتهى الفلسفه الله هو الخالق وحده، وهو الآمر الناهي وحده. لا يحق لأحد أن يعترض على خلقه أو يشرع في دينه بغير إذنه.

الحمدلله على كل حال اللهم حسن الخاتمه والنجاة من النار 🇸🇦💐🤲

الله يرحم موتانا وموتى المسلمين اجمعين ويرحمنا إذا صرنا إلى ماصارو اليه

امور تفرد بعلمها الله سبحان وتعالى واخفاها لحكمة ... ارى ان تداول مثل هذا النقاشات اقرب للتنجيم او بداية طريق التنجيم والكهانه وامل ان تتم محاربتها

رب أعوذ بك من همزات الشياطين وأعوذ بك رب أن يحضرون

كفى بالموت واعظا.. مايصير تركب موسيقى

نمر بن عدوان كان فارس وشاعر وبطل الين ماتغير في وقتنا هذا الى مشهور تيك توك ماخذينه رايح جاي للاسف فغلب نمر الزمن هذا على نمر الحقيقي لان السوق حاليا يبغى يضحك مايبغى بطولات

الملائكة لا احد يراهم بعينه الا حزة خروج الروح.. اما سوالف بعض البشر هداهم الله فهي غير صحيحة..