يا اخوانا في الظروف الصعبة دي، الوعي الصحي والمعرفة بكيفية التعامل مع الكوليرا مهم جداً الكوليرا مرض خطير لكن علاجو ساهل والوقاية منو أسهل، وبمعرفة بسيطة ممكن الناس تتجنب الإصابة الكوليرا مرض بكتيري بنتشر عبرة الموية أو الأكل الملوث ببكتيريا الكوليرا أعراضه الرئيسية هي: ▪︎ إسهال مائي غزير وشديد... جداً ▪︎ قيء متكرر خطورة الكوليرا في إنو الإسهال والقيء بتسببوا في فقدان الجسم لكميات هائلة من السوائل والأملاح في وقت قصير جداً، الحاجة دي بتعمل جفاف شديد وإذا ما إتعوض بسرعة، ممكن تسبب الصدمة والوفاة في غضون ساعات قليلة ركيزة العلاج الأساسية بتكمن في تعويض السوائل المفقودة دي أهم معلومة الناس تتذكرها عن الكوليرا هي إنو العلاج الرئيسي والحاسم هو تعويض السوائل والأملاح المفقودة في أسرع وقت محلول الOral Rehydration Solutions - ORS ده هو الخط الأول والأهم في علاج معظم حالات الكوليرا، وخاصة الجفاف الخفيف والمتوسط هو عبارة عن مسحوق بتذوب في لتر من الموية النظيف بشتغل كيف؟ برجع للجسم الماء والأملاح الضرورية البفقدها بسبب الإسهال ناخدو متين؟ بمجرد الإسهال بدأ، طوالي تبدأ تأخذ الـ ORS بكميات صغيرة ومتكررة، كلما مالقيت طريقة أشرب وين نلقى المحلول ده؟ مفروض يكون متوفر في المراكز الصحية والعيادات والمستشفيات، بتلقى في عبوات مكتوب عليها "محلول معالجة الجفاف" المحاليل بالوريد دي لحالات الجفاف الشديد جداً، لمن يكون العيان ماقادر يشرب بسبب الإستفراغ الشديد أو فقدان الوعي، أولمن محلول الـORS مايجيب حقو أهم المحاليل دي هو الرينجر اللاكتات Ringer's Lactate Solution لأنو بحتوي على الأملاح بتوازن قريب من سوائل الجسم وبساعد على تصحيح الحموضة البتحصل مع الجفاف الشديد الناس تتذكر إنو سرعة البدء في تعويض السوائل دي هي الفاصل بين الحياة والموت في حالات الكوليرا الشديدة .. المضادات الحيوية ما بديل عن تعويض السوائل لكن المضادات الحيوية دي بتساعد في تقليل مدة الإسهال وشدتو، وبالتالي تقليل كمية السوائل المفقودة ... أزيثروميسين (Azithromycin) للأطفال والحوامل .. الدوكسيسايكلين (Doxycycline) للبالغين ... في النهاية المضاد ده بصفو الطبيب الناس ماتاخدو من غير استشارة طبيب ممكن برضو ندي الأطفال مكملات الزنك، الزنك بساعد في إنو يقلل مدة وشدت الإسهال وبقلل كمان من تكرارها في المستقبل القريب ختاماً، الناس تتذكر الوقاية خير من العلاج في الوضع الحاصل ده الوقاية هي خط الدفاع الأول الناس تحاول تشرب الموية من مصادر موثوقة ونظيفة انا عارف الحاجة دي صعبة واغلب الناس بتجيب الموية من البحر غالبا اغلوا الموية لحدي ماتغلي وتظهر الفقعات بتاعت الغليان خليها تغلي كده لمدة دقيقة قبل الشراب ... غسلوا يدينكم كويس بالموية والصابون أو جيب ليك معقم الأيدي من اقرب صيدلية، بالذات بعد الحمام وقبل انك تطبخ الأكل، وقبل الأكل ... الناس تتجنب الأكل المكشوف يخوانا وتوقف انها تاكل في مطاعم برا بالذات خلال الفترة دي ... الناس تتعاون مع الكوادر الصحية،واي معلومة بسيطة عرفتها حاول وصلها بطريقة مبسطه لجارك وللناس الحوليك ممكن تكون سبب في انك تنقذ حياتو ! ربنا يحفظ السودان وأهلو من كل مكروه وربنا يرفع البلاء والوباء والأمراض #الكوليراshow more

🇸🇩 Ибн-Алкаттаб - بن الخطاب

9,429 subscribers

Поделиться Скачать