القصيمي لا يطارد المشكلة... بل ينصب لها الحل. الفيديو أدناه يوثق قصة طريفة وذكية. بعد دخول ثعبان أسود إلى مستودع مكتظ بالأثاث، كان البحث عنه أو مطاردته مخاطرة. فكانت الفكرة أبسط من ذلك: علبة تونة لجذب الفريسة، وبجوارها مصيدة مناسبة. وخلال ساعات انتهت المشكلة دون فوضى، ودون تفريغ المستودع،... ودون تعريض أحد للخطر. أحيانًا لا يكون الذكاء في مطاردة المشكلة، بل في جعلها تأتي إلى الحل بنفسها.show more

خلاص الله يعافيك عرفنا ان القصيم هي منارة الابداع والعلم في العالم من كثر ماتمدح . القصمان والنعم فيهم و في غيرهم ولكن كانك مزود عيار التطبيل شوي لان الفكرة هذي سبقهم بها كثير ومعروفة من زمان

كل ما طق عود حصاة قالوا قصيمي الله يستر لا يقولون بكرة زمزم أصلها من القصيم 🤮🤮

الضليع في لهجة واسطة نجد يعرف تمامًا ان اللي بالفيديو لهجته ليست لهجة أهل القصيم هذا لهجتة من واحدة من اقاليم نجد سدير أو الوشم أو المحمل

هذا الأسود الخبيث وليس الصل الأسود الفرق بينهم في شكل الرأس والطول الأول بالصورة راسه على نفس امتداد وحجم الجسم وطوله قصير وما يلمس أو يمسك بدون أدوات خاصة أما الصل الأسود راسه مثلث وأكبر من حجم الجسم

ماهو قصيمي لو قصيمي كان تكملة القصة: صاد الداب وصلخ جلده سوى محفظة جلد فاخرة وشلع ناب الداب حطه ابرة خياطة وعيونه حطها فص خاتم

لا الداب صل؛ ولا المخترع أو المبتكر قصيمي؟! وبعدين؛ الكرتون خفيف، يبي له لوح، وكثر صمغ!! والحافظ الله، مثل ذا المستودعات الطارفة، يابد له حبالة، وكل اسبوع ترش مواد غير سامة على المداخل والزوايا المظلمة؟! وفي المزارع، عليك بتربية هالاجودي✨👇

قصيمي وقصيمي راحوا عند قصيمي ، وكان فالمجلس قصيمي ، قال القصيمي للقصيمي كيف حالك يا قصيمي رد القصيمي بخير دام ان مع القصيمي

ثناءك على هذي الفكرة وحصرها فقط على منطقة معينة انتقاص من باقي مناطق المملكة وكأنهم معطلين نعمةالتفكير او لايفكرون أصلا برغم أنها من بديهيات الحلول اللي ممكن يطرحها اي إنسان في كل انحاء العالم

ونعم والله بالقصمان وكل مناطق المملكة لكن من كلامه يقول قطــع ويقول دْخَل تحت العفش هذا من خبرتي زلفـاوي قح 😅

ونعم بالجميع بس ٢٠٠% مهب قصيمي، من اللهجة.

وش هالعنصرية حتى اللهجة ما توحي انها قصيمية الافقضل لو قلت بعض الناس لا يطارد المشكلة بل ينصب لها حل

لهجته ماهي قصيمية ياقربها لهجة اهل سدير

انا من القصيم الاخ الفاضل الله اللي يشرح الفيديو ليس قصيمي اما من اهل الزلفي او سدير من خلال اللهجه

قدس الله سر القصمان ما اسنعهم 👍🏽😎 لا يجيني احد من الرياض يقولي إنا طال عمرك سابقينكم فيذا السنع و لا يجيني جيزاني يقولي والله انك أم كاذب تراني ماقلت الا الحق ربعي و انا اعرفهم زين فوق التقييم دائماً ☻💔

حل رائع في وقت سريع وبالهداوه بعد ههههه

أسميتها حلول القصمان، لأنها ببضعة ريالات حلت مشكلة كانت ستحتاج إلى تكاليف أعلى بكثير. وهذا من براعة أهل القصيم في ابتكار حلول عملية بأبخس الأثمان.

حلول القصمان اسم جميل ، لابد باعتماده خلاص✌️

لهجتة لهجة القصب ماهو قصيمي

القصيمي لايطارد المشكلة! الفكرة جميلة، لكن تكرار ربط “القصيمي” بكل موقف ذكي مبالغة حتى في لو كان الموضوع "ترند" . الذكاء والخطأ ليسا مرتبطين بمنطقة معينة، لذا الأفضل الإشادة بالفكرة نفسها دون تحويلها إلى فخر أو تحيز مناطقي.

والله سويناها زمان علشان فار دخل حوشنا وسوينا استنفار.. بالأخير لقينا بنت أختي الصغيرة ناشبه رجولها فيه.

عطونا حل يالقصمان او غيرهم فار صغير كبر الإصبع له شهر حطينا صمغ وحطينا سمع فيران يمرهم وياكل ولا ينصاد ولا يذبحه السم

القصيمي ما يعرف الفرق بين التونة والسردين

ترى ازعجتونا بالقصمان هالشي ابسط انسان بالكره الارضيه يسويها الا اذا انت دلخ ماتعرف تسوي شي بحياتك مشكله

للأمانة مهب قصيمي

الطريقه معروفه من قديم بس بعض الناس مطيور يلاحقها وعموا الفكرة هي فكرة غراء الفيران

شكله اللي بالفديو اسمه فلان القصيمي لان لهجته مستحيل قصيمي .. بعدين انت تقول ساعات وهو يقول 3 أيام !! يا ان انت ساعتك موقفة وداخله ماء او انه هو عايش بالتايم لبس وبعد كل هذا ما شفنا لا صلّ ولا تسنّن

هذا من الحقيل من قرية الحائر بمحافظة المجمعة

هذي لهجة سدير

هذا الاسود الخبيث انتبهو منه ولايمسك براسه ابدا لان انيابه متحركه ترجع للورى وسمه اخطر سم بالعالم يكفيه ثلث ساعه لقتل رجل بالغ

لهجته مهب لهجة اهل القصيم ولا ماعرفت من وين قلت قصيمي

الطريقة جميلة اللهجة سيدراوية ماهي قصيمية تبي تتأكد ركز على كلمة (دخل)

لهجة الرجل من الزلفي - والثعبان هو الأسود الخبيث

على طول حطوه قصيمي

حلوة الفكرة ، لكن اللهجة مو قصيمي .

ما عجبني التمييز العنصري بمنشورك

اللهجه بعيدة كل البعد ربما سدير او الزلفي

من اللهجة ( زلفاوي) استمارة ونمره