تكفون يا جماعة .. الله لا يغيرها نعمة ! يومياً تمتد السفرة طول وعرض.. وللأسف، نصّها يروح في مكب النفايات 👎🏼

كلنا شفنا مثل هذي المناظر في رمضان ! وأجزم أن ٥٠٪ من أشكال هذي الوجبات يروح هدر. وتلقى اللي يجلسون على السفرة ما يتعدون أصابع اليد الوحدة.

٤ مليون طن من الأكل في السعودية يهدر سنويا 👎🏼 الرقم مرعب جداً ! ولو ما تعرف وش تقريبا حجمها، تراها تعادل عدد ١.٦ مليون سيارة جمس على سبيل المثال !! هذي الكمية سنوياً تروح في مكب النفايات تكرمون.

(الزود ولا النقص) أسمه هدر 🤚🏼 قل الكلافة كرم قل الكلافة تقدير قل الكلافة حظ للنعمة وبالشكر، تدوم النعم. ومن شكرنا للنعمة اننا نحافظ عليها..

حسب آخر احصائية تقول أن أكثر الأغذية في الهدر في السعودية هو : ١- الخبز والمعجنات ٢- الزر ٣- الطماط ٤- البطاطس ٥- التمر ٦- البطاطس

أهلنا الأولين وهم دايم مضرب للكرم، كان الصحن الواحد يجلس عليه ١٥ والا ٢٠ رجال.. ولا أحد ذكرهم بسوء والا قلل من كرمهم.

الحفاظ على النعمة فيه: ١- أجر وبركة ٢- توفير اقتصادي ٣- حفظ للجهد والوقت

من أبسط الحلول اللي تساعد من الحد من الهدر ١- لا تشتري والا تتقضى وانت جايع ٢- سجل الأغراض اللي تبيها في الملاحظات ٣- لاتغرك العروض واشتر اللي تحتاجه بس ٤- تأكد من تاريخ صلاحية المنتجات ٥- تأكد أن عندك مساحة تخزين مناسبة

إذا جيت تحط الاغراض في الثلاجة تأكد أنها في المكان الصحيح عشان تحافظ على مدة صلاحيتها. ١- كل نوع أكل له مكان مخصص ٢- تأكد من ضبط درجة الحرارة ٣- افصل بين الأطعمة قد ما تقدر

عند الطبخ ١- أعرف عدد الي بياكلون بالضبط ٢- تذكر أن (كل مشروك مبروك) ٣- ما له داعي تكثر أصناف ٤- استخدم ادوات مساعدة مثل صحن مشعل

وإذا جيت تطلب من مطعم ترى موب شرط تاكل سلطة وشوربة و مقبلات وطبق رئيسي وحلا و و و الخ طبق والا اثنين بالكثير بركة وأهم شي تغطي احتياجك الغذائي. واحرص على الأحجام الصغيرة حتى لو كان سعر الحجم الكبير مغري..

أهلنا إذا انتهت صلاحية اللبن، استخدموه في الجريش 👍🏼 هذا اسمه إعادة تدوير الأكل ويعتبر من الحلول اللي تساعد في الحد من الهدر !

ولو نسيت تطبق أي من الوسائل اللي تساعدك في الحد من الهدر، تذكر أن فيه ناس ينتظرون فايض النعمة اللي عندك 🤚🏼 تواصل مع أي جمعية لحفظ الطعام ويجونك لين باب بيتك وبحطهم تحت هذي التغريدة. والله لا يغيرها نعمة ويحفظها من الزوال

جمعية خيرات لحفظ النعمة في الرياض

( إطعام ) لحفظ النعمة وموجودين في الرياض وجدة والدمام والأحساء والجبيل

جمعية حفظ النعمة في الرياض

جمعية حفظ النعمة في عسير

جمعية حفظ النعمة في حائل

جمعية إكرام لحفظ النعمة في مكة المكرمة