د شر او فساد تښتېدلي غړي، د مختلفو جنایتونو له امله له بهرنيو هېوادونو هم رټل او شړل کېږي! هندوکش‌غږ د پرځېدلي جمهوریت پرمهال د بغلان او تخار امنیه قوماندان او د شر او فساد ډلې فعاله غړي جنرال اکرام الدین سریع چې په ایران کې مېشت دی، غږیز... ثبت ترلاسه کړی؛ نوموړی وايي: د دې جبهې غړي په یاد هېواد کې د فساد، غلاوو، اختطافونو، یرغمل نیونو، اخلاقي فسادونو او ګڼو نورو ناوړه کارونو له امله ډله ډله بېرته افغانستان ته شړل کېږي. د نوموړي په خبره، دی هڅه کوي چې له افغانستان څخه ورتښتېدلو دغو کسانو ته چې لویه برخه یې د پرځېدلي جمهوریت نظامیان دي، هلته د پناه او اقامې اخیستلو زمینه برابره کړي، خو په وینا يې دا کسان هلته په داسې جنایتونو، جرمونو او ناوړه اعمالو لاس پورې کوي، چې ان په ایراني ټولنه کې یې هم ساری نشته، نو ځکه ایران دوی ته له پناه او اقامې ورکولو بېزاره شوی دی. د سریع په وینا، د دغو کسانو ناوړو او بدنامو کارنامو، فسادونو او جرمونو دی هم په تنګ کړی او خبرداری یې ورکړی، که وضعیت همداسې روان وي، د دوی د نیولو لپاره د ایران له حکومت سره لاس یو کوي او پر وړاندې یې اقدام کوي. د یادونې وړ ده چې د شر او فساد غړو په افغانستان کې دننه هم د جمهوریت تر فاسد چتر لاندې نږدې دوه لسیزې ستر جنایتونه، غلاوې، فسادونه او ناوړه کارونه وکړل، خو اوس یې دا لړۍ بهر ته غځولې او هلته هم غلاوې، اختطاف او نور جنایتونه ترسره کوي چې د کوربه بهرنیو هېوادونو سخته غوسه یې هم راپارولې ده. هېره دې نه وي؛ په افغانستان کې د جمهوري حکومت له پرځېدو وروسته، د شر او فساد ګڼ شمېر غړي مختلفو هېوادونو ته وتښتېدل. دوی د خپلو ناوړه کړنو او جنایتونو له امله په بهرنیو هېوادونو کې هم نه یواځې دا چې محبوبیت یې نه دی ترلاسه کړی، بلکې لا هم د خلکو د نفرت او کرکې سره مخ دي.show more

Loading video...